قازاقستان ەكولوگتارى سۋدى قالاي ۇنەمدەۋگە بولاتىنىن ايتتى

وسى ماقساتتا 212 كانالدى سيفرلاندىرۋ قاجەت.

قازاقستان ۇكىمەتى الداعى بەس جىلدا ۇزىندىعى 3،3 مىڭ كم بولاتىن 212 كانالدى سيفرلاندىرىپ، 2،2 تەكشە مەتر سۋدى ۇنەمدەۋدى كوزدەپ وتىر، دەپ حابارلايدى Almaty-akshamy.kz.

قازاقستاننىڭ ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعالييەۆتىڭ ايتۋىنشا، وتكەن جىلى تۇركىستان وبلىسىنداعى «ك-19» ماگيسترالدى كانالىن سيفرلاندىرۋ بويىنشا ءبىرىنشى جوبا ءساتتى جۇزەگە اسىرىلدى. ناتيجەسىندە 45 پايىزعا كوبىرەك سۋ جۇمسالاتىنى انىقتالعان.

سۋدى ۇنەمدەۋ ماقساتىندا مينيسترلىك سۋ ۇنەمدەۋ تەحنولوگيالارى قولدانىلاتىن اۋماقتى 2025 جىلعا قاراي 750 مىڭ گەكتارعا دەيىن جەتكىزۋدى ۇسىندى.

«بۇگىنگى تاڭدا ارنالاردىڭ 60%-ى ناشار جاعدايدا. بۇل سۋدى تاسىمالداۋ كەزىندە ورىن الاتىن جوعارى شىعىننىڭ نەگىزگى سەبەبى»، – دەلىنگەن اتالمىش مينيسترلىكتىڭ باسپا ءسوز قىزمەتىنىڭ حابارلاماسىندا.

وسىعان بايلانىستى 5 جىل ىشىندە ۇزىندىعى شامامەن 2،3 مىڭ كم بولاتىن تاعى 120 ارنانى قايتا جاڭارتۋ جوسپارلانىپ وتىر.

«ارنالاردى قالپىنا كەلتىرۋ جۇمىستارى تۇراقتى تۇردە جۇرگىزىلۋدە. ماسەلەن، 2019-2020 جىلدارى 1734 كم كانال جوندەلىپ، 111،5 گەكتار سۋارمالى جەر اينالىمعا ەنگىزىلدى. بيىلعى جىلدىڭ سوڭىنا دەيىن 1050 شاقىرىم كانالداردى قايتا جاڭعىرتۋ جوسپارلانىپ وتىر. بۇل 78 مىڭ گەكتار سۋارمالى جەردى اينالىمعا ەنگىزۋگە مۇمكىندىك بەرەدى»، - دەدى ماعزۇم مىرزاعالييەۆ.