كاسىپكەرلەرگە ارنالعان ءموبيلدى قوسىمشا ازىرلەندى
ازىرلەۋشىلەردىڭ ايتۋىنشا، بۇل جاڭاشىلدىق كاسىپكەرگە جەكە ءىسىن جۇرگىزۋدى ايتارلىقتاي جەڭىلدەتەدى، دەپ حابارلايدى Almaty-akshamy.kz
وندا بۇگىندە مەملەكەتتىك كىرىستەر باسقارماسىنان الۋعا بولاتىن بارلىق قىزمەت قولجەتىمدى. وسىلايشا كاسىپكەرلەر سالىق ەسەپتىلىگىن مەملەكەتتىك ورگاندارعا بارماي-اق تاپسىرا الادى. قوسىمشانىڭ ارقاسىندا بۇل اۆتوماتتى تۇردە جۇزەگە اسادى. سونداي-اق بيزنەسمەندەر سالىق ورگاندارىنان قاجەتتى انىقتامالار مەن حابارلامالار الىپ، ولارمەن تىكەلەي مالىمەت الماسادى. بۇعان قوسا ءموبيلدى تۇعىرناما ەكىنشى دەڭگەيلى بانكتەرمەن بىرىكتىرىلدى. بۇدان بىلاي پايدالانۋشىلار سالىقتىڭ وتەمىن دە ۇيدەن شىقپاي-اق تولەي الادى.
ايتا كەتەيىك، جوبا مەملەكەت باسشىسىنىڭ جەكە كاسىپكەرلەر ءۇشىن سالىق مىندەتتەمەلەرىن ورىنداۋ راسىمدەرىن جەڭىلدەتۋ تۋرالى تاپسىرماسى اياسىندا جۇزەگە اسىرىلدى.
«ماقساتى – جەكە كاسىپكەردى تىركەۋدەن باستاپ ارنايى سالىق رەجيمدەرىن تاڭداۋدان، ەسەپ جاساۋ، كىرىستەر جۇرگىزۋ سىندى بارلىق جۇمىستى جەڭىلدەتۋ. بۇدان باسقا وسى قوسىمشا كاسسالىق اپپاراتتىڭ قىزمەتىمەن تولىقتىرىلدى، ياعني كاسسالىق تۇبىرتەكتەردى اعۋعا بولادى. كاسىپكەرلىك قىزمەتتى توقتاتۋ نەمەسە ونىڭ جۇمىسىن ۋاقىتشا دوعارۋ مۇمكىندىگى ىسكە اسىرىلدى. وسىلايشا كاسىپكەرلىككە قاتىستى قىزمەتتەردىڭ بارلىق ءتۇرى قوسىمشا ارقىلى جۇزەگە اسىرىلادى»، - دەدى ق ر قارجى مينيسترلىگى مەملەكەتتىك كىرىستەر كوميتەتى ءتوراعاسىنىڭ ورىنباسارى جايدار ىڭكەربايەۆ.