ەلدە الاياقتىق جاساۋ تىيىلماي تۇر
جۇزدەن استام وتانداسىمىز جۇمىس ىستەپ جانە شەتەلدە ءبىلىم الۋ ءۇشىن اقش-قا بارۋدى جوسپارلاعان. ولار الماتى قالاسىنداعى ۆيزالىق قولداۋ كورسەتەتىن جەكە كومپانياعا جۇگىنەدى. ءوزارا كەلىسىم جاساپ، بارلىعى قۇجاتتارىن تاپسىرادى. ءبىراق الگى مەكەمە اياقاستىنان ۇشتى-كۇيلى جوق بولىپ، ءبىراز ادام سان سوعىپ قالعان، دەپ حابارلايدى Almaty-akshamy.kz 24.kz سايتىنا سىلتەمە جاساپ.
شەتەلدە ءبىلىم الۋ جانە جۇمىس ىستەۋدى كوزدەگەن دانيار توقبەرگەنوۆ تە جەكە كومپانيا وكىلدەرىنە الدانىپ قالعانداردىڭ ءبىرى. ايتۋىنشا، ۆيزالىق قولداۋ ورتالىعى باسشىسى ەكى ايدان بەرى ۇستاتپاي جۇرگەن كورىنەدى.
«مەن سۇراعان اقشاسىن بەردىم. 428 مىڭ تەڭگەگە ارنايى شارت جاساستىق. ەكى اي ىشىندە امەريكالىق ۋنيۆەرسيتەتتەن شاقىرتۋ الدىم. تاعى 500 مىڭ بەر دەدى، سۇراعانىن جىبەردىم. تولەمنەن كەيىن ولار كونسۋلمەن سۇحبات بولاتىنىن ايتتى. مىنە، سودان بەرى قانشاما ۋاقىت ءوتتى. حابار-وشارسىز جوعالدى. اقشام دا، ۆيزا دا جوق»، - دەيدى قالا تۇرعىنى دانيار توقبەرگەنوۆ.
شەتەلدى اڭساعان جاستىڭ ءبىرى – ادەل امانوۆا. ايتۋىنشا، تەك ءوزى عانا ەمەس، تاعى 100 شاقتى ادام وسى كومپانيا الداۋىنا تۇسكەن. ولاردىڭ جالپى شىعىنى 10 ميلليون تەڭگەدەن اسادى. ول شيكىلىكتىڭ بارىن سەزگەن ساتتە ءبارى كەش ەدى. سەبەبى اقشانى العاندار ءىزىن سۋىتقان. الەۋمەتتىك جەلىدەن ءوزى ىسپەتتەس الدانعانداردى تاۋىپ، پوليسياعا ارىزدانىپتى.
اتالعان كومپانيا وكىلدەرى رەسمي جاۋاپ بەرۋدەن باس تارتقان. قۇزىرلى ورگانداردىڭ ايتۋىنشا ءقازىر سوتقا دەيىنگى تەرگەۋ «الاياقتىق» بابى بويىنشا قوزعالعان. الدانعان ادامدار اقشانى قايتارىپ قانا قويماي، سونىمەن بىرگە وسى ىسكە قاتىسى بار بارلىق جاۋاپتىلاردىڭ قىلمىستىق جاۋاپكەرشىلىككە تارتىلعانىن سۇرايدى.
«ءقازىر سوتقا دەيىنگى تەرگەپ تەكسەرۋ جۇرگىزىلىپ جاتىر. وسى ۋاقىتقا دەيىن 40 ادام ارىزداندى. كۇنى كەشە ەكى كۇدىكتى ءىس بويىنشا قاماۋعا الىندى»، - دەيدى قالالىق پوليسيا دەپارتامەنتىنىڭ رەسمي وكىلى سالتانات ازىربەك.