ەلىمىزدىڭ ءبىلىم بەرۋ وشاقتارىندا دەبات قوزعالىسىن دامىتىپ، وقۋشىلار مەن ستۋدەنتتەردىڭ پىكىر-سايىس قابىلەتىن ىلگەرىلەتۋشى ماماندارعا قوسىمشا تولەماقى جاساۋ يدەياسى كوتەرىلدى. بۇل باستامانى ءبىلىم جانە عىلىم ءمينيسترى اسحات ايماعامبەتوۆ العا تارتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
«جالپى ەلىمىزدىڭ مەكتەپتەرىندە دەبات قوزعالىسى جاقسى دامىپ كەلە جاتىر دەۋگە بولادى. بالالاردىڭ قىزىعۋشىلىعى بار. باستىسى ساپاعا جۇمىس ىستەۋ كەرەك. ەگەر كەيبىر مەكتەپتەردە دەبات جاتتىقشىرۋشىسى بولماسا نەمەسە دەباتتى ۇيىمداستىراتىن ءتيىستى ماماندار جوق بولسا، وندا دەباتتىق قوزعالىس بار دەپ قولدان جاساۋ قاجەت ەمەس. بۇل كەرىسىنشە پىكىر-سايىس قوزعالىسىن دامىتۋعا كەدەرگى كەلتىرەدى. سوندىقتان الدىمەن دەبات وتكىزۋدىڭ ءمان-جايىن بىلەتىن كادردى دايارلاپ، شارۋانى سوسىن قولعا الۋ كەرەك. مۇمكىن دەباتتى ۇيىمداستىرۋشىلارعا تولەماقى وتەۋ جاعىن قاراستىرۋ كەرەك شىعار»، - دەدى اسحات ايماعامبەتوۆ مينيسترلىكتە وتكەن اپپارات كەڭەسىنىڭ جيىنىندا.
ءمينيستردىڭ ايتۋىنشا، ءبىلىم بەرۋ وشاقتارىندا دەبات قوزعالىسىنىڭ ىلگەرىلەۋىنە ۇلەسىن قوسىپ جاتقان مامانداردى ىنتالاندىرۋ كەرەك. سونداي-اق، ا.ايماعامبەتوۆ «وقۋعا قۇشتار مەكتەپ» جوباسى تۋرالى ءسوز قوزعادى.
«بۇل جوبادا جاقسى جولعا قويىلعان. مەن جالپى وڭىرلەردى ارالاعاندا مەكتەپ باعدارلاماسىنان تىس ءبىلىم بەرۋ جوبالارىنىڭ ورىندالۋ بارىسىن دا قاداعالايمىن. تاياۋدا ساپارمەن اقتوبە وبلىسىندا بولدىم. سوندا سەكىلدى مارتوك، حلەبوداروۆكا، اقجار سەكىلدى شالعاي ەلدىمەكەندەردە «وقۋعا قۇشتار مەكتەپ» جوباسى جاقسى دەڭگەيدە جۇزەگە اسىپ جاتىر. سونىمەن قاتار سقو-نىڭ ءبىرقاتار شەتكەي اۋىل مەكتەپتەرىندە دە ءبىلىم جوبالارىنىڭ ىسكە اسۋىن ۇلگى تۇتۋعا بولادى»، - دەيدى ول.