قازان ايىمەن سالىستىرعاندا، سىرقاتتانۋشىلىق 1،6 ەسە ءوستى.
سەرىك جۇمانعارين ەل اۋماعىندا كوروناۆيرۋستىق ينفەكسيانىڭ تارالۋىنا جول بەرمەۋ جونىندەگى ۆاك وتىرىسىن وتكىزدى، دەپ حابارلايدى Almaty-akshamy.kz Primeminister.kz cىلتەمە جاساپ.
30 قاراشادا پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى سەرىك ءجۇمانعاريننىڭ توراعالىعىمەن قازاقستان رەسپۋبليكاسىنىڭ اۋماعىندا كوروناۆيرۋستىق ينفەكسيانىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسى ءوتتى.
رەسپۋبليكادا قاراشادا قازان ايىمەن سالىستىرعاندا سىرقاتتانۋشىلىق 1،6 ەسە ءوستى (اپتاسىنا 453-تەن 725 جاعدايعا دەيىن). دەنساۋلىق ساقتاۋ ۆيسە-مينيسترى ايجان ەسماعامبەتوۆا اتاپ وتكەندەي، COVID-19-عا تەستىلەۋ سانى ازايدى، سەبەبى اۋرۋ جەڭىلدەي باستادى، كوبى مەديسينالىق كومەككە جۇگىنبەيدى.
بارلىق وڭىرلەردە ينفەكسيانىڭ رەپرودۋكتيۆتىلىك كورسەتكىشى بىردەن ارتىق، بۇل - ۆيرۋستىڭ حالىق اراسىندا بەلسەندى اينالىمى مەن تارالۋىنىڭ بەلگىسى.
وڭىرلەر بولىنىسىندە سوڭعى ايدا ەلىمىزدىڭ 3 وڭىرىندە – الماتى، استانا جانە قاراعاندى وبلىسىندا اۋرۋشاڭدىقتىڭ اپتا سايىن 2،2 ەسەگە دەيىن ءوسۋى بايقالادى.
سونداي-اق 5 وڭىردە (اقمولا، اتىراۋ، جامبىل، ۇلىتاۋ وبلىستارى، شىمكەنت) سوڭعى اپتادان باستاپ سىرقاتتانۋ اپتاسىنا 3،5 ەسەگە دەيىن بىرتىندەپ ءوسىپ كەلەدى.
سوڭعى سەكۆەنيرلەۋ قورىتىندىسى بويىنشا رەسپۋبليكادا وميكرون BQ.1.1 (سەربەر) شتامى نۇسقاسىنىڭ 0،5% اينالىمى انىقتالدى، 99،5% – وميكرون شتامىنىڭ باسقا نۇسقالارى.
حالىقتى كوروناۆيرۋستى ينفەكسياعا قارسى ۆاكسيناسيامەن قامتاماسىز ەتۋ ماقساتىندا وڭىرلەرگە 12 جاستان اسقانداردى ۆاكسيناسيالاۋ جانە ريەۆاكسيناسيالاۋ ءۇشىن Pfizer ۆاكسيناسىنىڭ 200 مىڭ دوزاسى جەتكىزىلدى.
وتىرىس قورىتىندىسى بويىنشا، وبلىستاردىڭ، الماتى، استانا جانە شىمكەنت قالالارىنىڭ اكىمدىكتەرىنە ەپيدەميولوگيالىق جاعدايدى، اسىرەسە، حالىقتىڭ سانيتارلىق-ەپيدەميولوگيالىق تالاپتاردى ساقتاۋى، ءاقپاراتتىق-تۇسىندىرۋ جۇمىستارىن، ونىڭ ىشىندە جرۆي مەن تۇماۋدىڭ الدىن الۋ بويىنشا شارالاردى باقىلاۋدا ۇستاۋ تاپسىرىلدى.
ۇجىمدىق يممۋنيتەتتى ساقتاۋ ءۇشىن سوڭعى ۆاكسيناسيادان كەيىن 6 اي ارالىقپەن كوروناۆيرۋستىق ينفەكسياعا قارسى ريەۆاكسيناسيا الۋ قاجەت، ول ءۇشىن رەسپۋبليكادا كوروناۆيرۋستىق ينفەكسياعا قارسى ۆاكسينالار مولشەرى جەتكىلىكتى.