قىزمەت كورسەتۋ ساپاسىن ارتتىرۋ ماقساتىندا 2 جەلتوقساننان باستاپ №202 جانە №205 مارشرۋتتارعا Foton ماركالى جاڭا اۆتوبۋستار شىعارىلاتىن بولادى.
ەندى مارشرۋتتاردا سىيىمدىلىعى 85 ادامعا دەيىنگى 12 مەترلىك اۆتوبۋستار قىزمەت كورسەتەدى. اۆتوبۋستار تابيعي گازبەن جۇرەدى، پاندۋسپەن جانە اۋا سالقىنداتقىشپەن جابدىقتالعان، دەپ حابارلايدى Almaty-akshamy.kz الماتى قالالىق موبيلدىلىك باسقارماسىنا سىلتەمە جاساپ.
بۇعان دەيىنگى اۆتوبۋستاردىڭ سىيىمدىلىعى 70 ادامعا دەيىن بولعان. №202 مارشرۋتتا لياز ماركالى 15 اۆتوبۋس قىزمەت كورسەتكەن. سوڭعى ايلاردا جوسپارلى شىعۋ 40%-عا تومەندەگەندىكتەن، 20 جاڭا اۆتوبۋستى وسى مارشرۋتقا شىعارۋ تۋرالى شەشىم قابىلداندى. جىلجىمالى قۇرام جاڭارتىلعاننان كەيىن، ءجۇرۋ جيىلىگى 14-15 مينۋتتى قۇرايدى دەپ جوسپارلانىپ وتىر.
سونىمەن قاتار، "سايران" اۆتوبەكەتى مەن قاسكەلەڭ اراسىندا قاتىنايتىن مارشرۋتتىڭ جولاۋشىلار اعىمى ايىنا 160 مىڭنان 400 مىڭعا ارتادى دەپ كۇتىلۋدە.
سوڭعى كەزدەرى جوسپار بويىنشا شىعۋدىڭ 50%-ى عانا قاماتاماسىز ەتىلىپ جۇرگەن №205 مارشرۋتتا 18 اۆتوبۋس قىزمەت كورسەتتى. ەندى "وربيتا" شاعىناۋدانىنان "جەتىسۋ" بازارىنا قاتىنايتىن مارشرۋتتا 25 جاڭا اۆتوبۋس جولعا شىعارىلىپ، ءجۇرىس ينتەرۆالى 7-9 مينۋتتى قۇرايتىن بولادى.
جولاۋشىلار اعىمى بۇل مارشرۋتتا ايىنا 300 مىڭنان 500 مىڭعا وسەدى دەپ كۇتىلىپ وتىر.
قالالىق موبيلدىلىك باسقارماسى قىزمەت كورسەتۋ ساپاسىن ارتتىرۋ مەن ءجۇرىس جيىلىگىن ارتتىرۋ باعىتىندا ءبىرقاتار شارا قابىلداپ جاتقاندىعىن اتاپ وتكەن ءجون. مارشرۋتتاردا تۋىنداعان ماسەلەلەر كەزەڭ-كەزەڭمەن شەشىمىن تاباتىن بولادى.