2023 جىلدىڭ 1 ساۋىرىنەن باستاپ ەلىمىزدە اياقكيىم ونىمدەرىن تاڭبالاۋ مەن قاداعالاۋ ەرەجەلەرى تولىق كۇشىنە ەندى.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، بيىل ناۋرىزدا 6 145 348 اياقكيىم تاڭبالانعان. بۇل اقپان ايىنداعى كورسەتكىشتەن 80%-عا (3 365 438) جوعارى، دەپ حابارلادى Elorda.info.
سونىمەن قاتار 2022 جىلمەن سالىستىرعانداتاۋارلاردى تاڭبالاۋ مەن قاداعالاۋدىڭ اقپاراتتىق جۇيەسىندەگى بيزنەستىڭ بەلسەندىلىگى 46%-عا ۇلعايعانى بايقالىپ وتىر.
2023 جىلدىڭ 1 ساۋىرىنەن باستاپ ەلىمىزدە اياقكيىم ونىمدەرىن تاڭبالاۋ مەن قاداعالاۋ ەرەجەلەرى تولىق كۇشىنە ەندى. دەمەك، بۇدان بىلاي تاۋارلاردى تاڭبالاۋ مەن قاداعالاۋدىڭ اقپاراتتىق جۇيەسىندە (تتق اج) تىركەلمەگەن اياقكيىمدى ساتۋعا تىيىم سالىنادى.
مىندەتتى تاڭبالاۋ پروسەسىنە الدىن الا دايىن بولۋ ءۇشىن كاسىپكەرلەرگە ەكى جىلدان استام ۋاقىت بەرىلدى: 2019 جىلدىڭ 30 ماۋسىمىندا قاناتقاقتى جوبا ىسكە قوسىلسا، 2021 جىلدىڭ 1 قاراشاسىندا اياق كيىمدى تاڭبالاۋ ەرەجەلەرى بيزنەسكە كوپتەگەن جەڭىلدىگى قاراستىرىلعان زاڭنامالىق ەرەجەگە اينالدى.
تاۋارلاردى تاڭبالاۋ مەن قاداعالاۋ جۇيەسىنىڭ نەگىزگى ماقساتى – قازاقستاندا اشىق ساۋدانى دامىتۋ. جوعارىدا اتالعان اقپاراتتىق جۇيەدە (تتق اج) اياق كيىم ونىمدەرىنىڭ كارتاسىن تىركەگەنسوڭ وعان قاتىستى اقپارات پايدا بولادى. سونىڭ نەگىزىندە ءونىمنىڭ بىرەگەي تاڭبالاۋ كودى قالىپتاسادى. سول ارقىلى ءار اياق كيىمنىڭ داناسى جەكە، ياعني بولەك قاداعالانادى.
«بىرىنشىدەن، تاڭبالاۋ پروسەسى تۇتىنۋشىلاردىڭ قۇقىقتارىن قورعاۋعا باعىتتالعان. بۇل ارقىلى ساتىپ الۋشى قاجەتتى ءونىم تۋرالى تولىق اقپاراتقا قانىعىپ، تاڭداۋ قۇقىعىن يەلەنەدى. تاڭبالاۋ مەن قاداعالاۋدىڭ ەكىنشى ماڭىزدى ماقساتى – كولەڭكەلى ەكونوميكانى تەجەۋ. ياعني، زاڭسىز يمپورتتى جانە وعان قاتىستى نارىقتى جويۋ كوزدەلىپ وتىر»، - دەدى QazTextileIndustry (دەربەس باسقارۋ ۇيىمى) ۇلتتىق جەڭىل ونەركاسىپ قاۋىمداستىعىنىڭ باسقارما ءتوراعاسى گۇلميرا ۋاحيتوۆا.
بىلتىر ەلىمىزدە قاڭتار-ناۋرىز ارالىعىندا 223،9 مىڭ دانا اياقكيىم شىعارىلسا، بيىل ونىڭ مولشەرى 421،5 مىڭعا جەتكەن. وندىرىستىك ديناميكا 88%-عا ارتقان.
ەسكە سالا كەتەيىك، قازاقستاندا سيفرلى تاڭبالاۋ مەن قاداعالاۋ تەتىگى 3 ءونىم تۇرلەرىنە قولدانىلىپ كەلەدى. اتاپ ايتساق، 2020 جىلدان باستاپ تەمەكى ونىمدەرىنە، 2021 جىلدىڭ قاراشاسىنان باستاپ اياقكيىم ونىمدەرىنە، سونداي-اق بىلتىرعى قاراشا ايىنان بەرى 90 دارىلىك زاتقا قولدانىلىپ جاتىر.