اتالمىش شارا 24-30 ماۋسىم ارالىعىندا وتەدى.
قازاقستان ۇكىمەتى بوس جۇمىس ورىندارىنىڭ العاشقى ونلاين-جارمەڭكەسىن وتكىزۋدى كوزدەپ وتىر. بۇل تۋرالى ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ول الدىمەن ەڭبەك نارىعىندا جۇمىسپەن قامتۋ ماسەلەسى قالاي شەشىلىپ جاتقانىن ءتۇسىندىردى.
«ءبىرىنشى كەزەكتەگى ماسەلە - جاستاردى جۇمىسقا تارتۋ. ول ءۇشىن ورتا جانە ءىرى كاسىپورىندارداعى بوس جۇمىس ورىندارىنا ونلاين-جارمەڭكە وتكىزۋ ارقىلى جاستاردى ەڭبەكپەن قامتۋ قولعا الدىق. بيىل مامىر ايىندا ERG كومپانيالار توبىمەن بىرلەسىپ، ءبىلىم بەرۋ ۇيىمدارىنىڭ تۇلەكتەرىن جانە 35-كە دەيىنگى جاستاردى جۇمىسقا ورنالاستىرۋدىڭ ونلاين-جارمەڭكەسى پيلوتتىق رەجيمدە وتكىزىلدى. كومپانيا 350 جۇمىس ورنىن ۇسىندى. ءبىر اپتانىڭ ىشىندە جۇمىس بەرۋشىنىڭ تالاپتارىنا سايكەس كەلەتىن 159 جاس ىرىكتەۋدەن ءوتىپ، جۇمىسقا قابىلداندى. ولاردىڭ اراسىندا ەلىمىزدىڭ بارلىق ءوڭىرىنىڭ وكىلدەرى بار»، - دەدى مينيستر.
ەڭبەكمينى پيلوتتىق جوبانىڭ قورىتىندىسىن ءبىلىم جانە عىلىم، ۇلتتىق ەكونوميكا، سيفرلىق دامۋ مينيسترلىكتەرىمەن جان-جاقتى زەردەلەگەن. تالقىلاۋعا تاۋ-كەن، مەتاللۋرگيا سالاسىنداعى كاسىپورىنداردىڭ جانە «سامۇرىق-قازىنا» اكسيونەرلىك قوعامىنىڭ وكىلدەرى دە بەلسەنە قاتىستى.
«سونىڭ ناتيجەسىندە بۇل كومپانيالارمەن وسى جىلدىڭ سوڭىنا دەيىن ەلەكتروندى ەڭبەك بيرجاسىنا 20 مىڭ بوس جۇمىس ورنىن ورنالاستىرۋ تۋرالى كەلىسىمگە كەلدىك. ونىڭ ىشىندە IT سالاسى مەن «اۋىل - ەل بەسىگى» جوباسى دا بار»، - دەيدى دۇيسەنوۆا ۇكىمەت وتىرىسىندا.
بوس جۇمىس ورىنداردىڭ العاشقى ونلاين-جارمەڭكەسى 24-30 ماۋسىم ارالىعىندا وتەدى.
«كەلەشەكتە اي سايىن تۇراقتى ۇيىمداستىرۋ كوزدەلىپ وتىرعان جارمەڭكە تەك كاسىپورىن ورنالاسقان ايماق تۇرعىندارىنا عانا ەمەس، بارلىق قازاقستاندىقتارعا بىردەي قولجەتىمدى بولۋىن، جۇمىسقا قابىلداۋ پروسەسىنىڭ اشىقتىعىن، جۇمىس ىزدەۋشىنىڭ ماقساتتى تاڭداۋىن، جۇمىس بەرۋشىلەردىڭ ساپالى ىرىكتەۋ مۇمكىندىگى بولۋىن قامتاماسىز ەتەدى»، - دەپ ءتۇسىندىردى ول.