ساباققا 27 000-نان استام مامان تارتىلعان.
قازاقستاندىق اسكەريلەر ماماندىق بويىنشا دايىندىق كەزەڭىن باستادى، دەپ حابارلايدى Almaty-akshamy.kz.
«ماماندىق بويىنشا دايىندىق – اسكەري قىزمەتشىلەردى وقىتۋدىڭ نەگىزگى كەزەڭى. ول ءبىر اي بويى جۇرگىزىلەدى جانە جەكە قۇرامنىڭ اتقاراتىن لاۋازىمدارى كولەمىندە فۋنكسيونالدىق مىندەتتەرىن زەردەلەۋگە باعىتتالعان»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
وسى كەزەڭدە مەرزىمدى قىزمەتتەگى اسكەري قىزمەتشىلەر شتاتتىق قارۋ-جاراق پەن اسكەري تەحنيكانىڭ ماتەريالدىق بولىگىن، ولاردى پايدالانۋ ءتارتىبىن، جاۋىنگەرلىك ماشينالاردى اتۋ جانە جۇرگىزۋ قاعيدالارىن زەردەلەيدى. ال كەلىسىمشارت بويىنشا اسكەري قىزمەتشىلەر ءوز بىلىمدەرى مەن داعدىلارىن جەتىلدىرەدى.
ساباققا 27 000-نان استام مامان تارتىلعان. ولاردى ساپالى وتكىزۋ ءۇشىن قارۋلى كۇشتەردە ءتيىستى ادىستەمەلىك دايارلىعى بار تاجىريبەلى نۇسقاۋشىلاردىڭ باسشىلىعىمەن 2000-نان استام وقۋ توپتارى قۇرىلدى.
وقۋ كەزىندە ورتالىق ورىن پراكتيكالىق ساباقتارعا ارنالعان. ولار جاتتىعۋ قۇرالدارىن پايدالانا وتىرىپ، وقۋ سىنىپتارىندا، سونداي-اق وقۋ پوليگوندارىندا ۇيىمداستىرىلعان.
بولىمشەلەردە ماماندىق بويىنشا دايارلاۋ كومانديرلەر مەن سەرجانتتاردىڭ باسشىلىعىمەن شتاتتىق-لاۋازىمدىق تاعايىندالۋىنا سايكەس جۇرگىزىلەدى.
وقۋ اياقتالعاننان كەيىن جەكە قۇرام وتكەن پاندەر بويىنشا سىناقتار مەن ەمتيحاندار تاپسىرادى. ساباقتار اعىمداعى جىلدىڭ 8 شىلدەسىنە دەيىن جالعاسادى.