الماتىدا ەسىرتكى جارنامالاعان تۇرعىن ۇستالدى

الماتىنىڭ تۇركسىب اۋدانىندا پوليسيا قىزمەتكەرلەرى ارنايى ءىس-شارانى جۇرگىزدى.

پوليسيا دەپارتامەنتىنىڭ اقپاراتى بويىنشا، كۇدىكتى بۇعان دەيىن دە ەسىرتكى قىلمىسى ءۇشىن ءىستى بولعان، دەپ حابارلايدى Almaty-akshamy.kz Polisia.kz-كە سىلتەمە جاساپ.

"شش. ەسىمدى ازامات بۇعان دەيىن، دالىرەك ايتساق، 2008 جىلى ەسىرتكى قىلمىسى ءۇشىن سوتتى بولدى جانە جازاسىن وتەدى. قاسكوي قايتادان ەسكى ءىسىن قولعا الىپ، قىلمىستىق زاڭنامانى بۇزدى. ءقازىر ول ەسىرتكىنى ونلاين ساتىپ الۋعا بولاتىن رەسۋرستارعا ترافارەتتىك جارنامالاردى سالاتىن “سۋرەتشى”. كۇدىكتى ءبىر اپتادان استام ۋاقىت بويى تىيىم سالىنعان “شىعارماشىلىقپەن” جۇمىس ىستەگەنىن مويىندادى. بۇل تۋرالى بىزدە باسقا دا مالىمەتتەر بار. ۇستالعان ادامنىڭ ايتۋىنشا، ول بۇعان دەيىن اۋەزوۆ، الاتاۋ جانە جەتىسۋ اۋداندارىندا ورنالاسقان عيماراتتارعا جازۋ جازعان. وعان جۇمىس ىستەگەنى ءۇشىن ەلەكتروندى ءاميان ارقىلى اقشا تولەگەن"، – دەيدى الماتى قالالىق پد ەسىرتكى قىلمىسىنا قارسى كۇرەس باسقارماسى باستىعىنىڭ ورىنباسارى ساعىندىق اياعانوۆ.

شش. ەسىمدى ازاماتتى تەكسەرۋ بارىسىندا بىرنەشە سايتتاردىڭ مەكەنجايلارى جازىلعان ترافارەتتەر مەن بوياۋلار تابىلدى جانە تاركىلەندى. ونىڭ ىس-ارەكەتى ق ر قك-نىڭ 299-1 بابىمەن سارالاندى. ەسىرتكى قۇرالدارىن، پسيحوتروپتىق زاتتاردى نەمەسە ولاردىڭ انالوگتارىن، پرەكۋرسورلارىن ناسيحاتتاعانى نەمەسە زاڭسىز جارنامالاعانى ءۇشىن ءۇش جىلعا دەيىنگى مەرزىمگە باس بوستاندىعىنان ايىرۋعا جازالانادى.