8 تامىزدان باستاپ وتىنىمدەر قابىلدانا باستايدى.
قازاقستان ۇكىمەتى بيزنەس باستاعىسى كەلەتىن ازاماتتارعا قارجىلاي كومەك بەرۋگە دايىن. وسى ماقساتتا ۇلتتىق جوبا اياسىندا گرانت بولىنەدى، تامىزدىڭ 8 باستاپ وتىنىمدەر قابىلدانا باستايدى، دەپ حابارلايدى Almaty-akshamy.kz.
«Business.enbek.kz پورتالىندا 2022 جىلعى 8 تامىزدان باستاپ 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا شەڭبەرىندە بيزنەس-يدەيالاردى ىسكە اسىرۋ ءۇشىن مەملەكەتتىك گرانتتار الۋعا وتىنىمدەر قابىلداۋ باستالادى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
مەملەكەتتىك گرانت – نىسانالى ماقساتى جاڭا بيزنەستى ىسكە قوسۋ جانە دامىتۋ بولىپ تابىلاتىن وتەۋسىز بەرىلگەن باستاپقى كاپيتال.
گرانت كولەمى 400 اەك-تى (1 225 200 تەڭگە) قۇرايدى. ءار قاتىسۋشى ونى تەك ءبىر رەت الا الادى.
گرانتتار قاراجاتى ءىسىن جاڭا باستاعان كاسىپكەرلەرگە وزدەرىنىڭ بيزنەس-الەۋەتىن اشۋعا، ءوندىرىستى جولعا قويۋعا جانە دامىتۋعا، سول ارقىلى ءوزىن تۇراقتى تابىسپەن قامتاماسىز ەتۋگە مۇمكىندىك بەرەدى.
ءوتىنىم بەرۋ ءۇشىن قاجەت:
- پورتالدا تىركەلۋ؛
- گرانت الۋ شارتتارىنا سايكەستىگىنە تەكسەرۋدەن ءوتۋ؛
- بيزنەس-جوسپار ۇلگىسىن جۇكتەپ الىپ، ونى تولتىرۋ جانە پورتالعا ەنگىزۋ؛
- ءوتىنىش نىسانىن تولتىرۋ جانە ەسق كىلتىمەن قول قويۋ.
ينتەرنەتكە نەمەسە كومپيۋتەرگە قولجەتىمدىلىك بولماعان جاعدايدا، حالىقتى جۇمىسپەن قامتۋ ورتالىقتارىنىڭ وزىنە-وزى قىزمەت كورسەتۋ ايماقتارىندا، حالىققا قىزمەت كورسەتۋ ورتالىقتارىندا، كاسىپكەرلەرگە قىزمەت كورسەتۋ ورتالىقتارىندا ءوتىنىم بەرۋگە بولادى.
گرانت الۋ ءۇشىن ءبىرقاتار شارتتاردى ساقتاۋ قاجەت.
جاڭا بيزنەس-يدەيانى ىسكە اسىرۋعا مەملەكەتتىك گرانت الۋعا ۇمىتكەر بولا الادى:
- تىركەلگەن جۇمىسسىزدار؛
- جەكە كاسىپكەرلەر (تىركەۋ مەرزىمى 3 جىلعا دەيىن)؛
- ءبىرىڭعاي جيىنتىق تولەمدى تولەۋشىلەر.
بۇل رەتتە ۇمىتكەر تومەندەگى الەۋمەتتىك ساناتتاردىڭ بىرىنەن بولۋ كەرەك:
- مۇگەدەكتىگى بار ادامدار؛
- قولدانىستاعى «كانداس» مارتەبەسى بار ادامدار؛
- ءوڭىرارالىق قونىس اۋدارۋشىلار
- از قامتىلعان وتباسى مۇشەلەرى؛
- كوپ بالالى وتباسى مۇشەسى (جۇبايى/زايىبى)؛
- مۇگەدەكتىگى بار بالانى تاربيەلەپ وتىرعان ادام (جۇبايى/زايىبى)؛
- اسىراۋشىسىنان ايىرىلۋ بويىنشا جاردەماقى الۋشىلار؛
- جاستار.
ۇمىتكەردىڭ «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ تۋرالى 3 جىلدان اسپايتىن مەرزىمگە سەرتيفيكاتى بولۋى ءتيىس.
راسىمدەردىڭ اشىقتىعىن قامتاماسىز ەتۋ، ادامي فاكتوردى ازايتۋ، ءوتىنىش بەرۋشىلەرگە ىڭعايلى بولۋ ءۇشىن گرانتتار بەرۋدىڭ بۇكىل پروسەسى ەلەكتروندىق فورماتقا اۋىستىرىلدى. گرانت الۋعا وتىنىمدەردى قابىلداۋ ءبىرىڭعاي تەرەزە – «Business.enbek.kz» پورتالى ارقىلى جۇزەگە اسىرىلادى.
گرانتتى قاجەتتى قۇرال-سايمانداردى، ەڭبەك قۇرالدارىن، تەحنولوگيالىق جابدىقتاردى، مالداردى، جانۋارلاردى، قۇستاردى، كوشەتتەردى، بۇتالاردى، تۇقىمداردى ساتىپ الۋعا، ورىن-جايلاردى جالعا الۋ اقىسىن تولەۋگە الۋعا بولادى.
گرانتتار تۇتىنۋشىلىق ماقساتتارعا، كرەديتتىك قارىزداردى وتەۋگە، جىلجىمايتىن تۇرعىن ءۇي ساتىپ الۋعا جانە سالۋعا، جەر ۋچاسكەلەرىن ساتىپ الۋعا، اكسيزدەلەتىن ونىمدەر وندىرۋگە بەرىلمەيدى.
گرانتتاردى حالىقتى جۇمىسپەن قامتۋ ورتالىقتارى گرانت الۋعا ۇمىتكەرلەردىڭ وتىنىشتەرىن قاراۋ جونىندەگى اۋداندىق/قالالىق كوميسسيانىڭ شەشىمى نەگىزىندە بەرەدى.
ۇمىتكەرلەر ءوز بيزنەس-جوباسىن كوميسسيا وتىرىستارىندا تانىستىرادى. بۇل رەتتە كوميسسيانىڭ ءاربىر مۇشەسى بيزنەس-جوسپاردى باعالايدى جانە باعالاۋ پاراعىن مىناداي ولشەمشارتتار بويىنشا تولتىرادى: بيزنەس-يدەيانىڭ باسەكەگە قابىلەتتىلىگى، وتكىزۋ نارىقتارىنىڭ پىسىقتالۋى، بيزنەس-جوبانىڭ قارجىلىق ومىرشەڭدىگى، كاسىپكەرلىك داعدىلاردىڭ دەڭگەيى، جاڭا جۇمىس ورىندارىن قۇرۋ.
وسىلايشا، گرانت بەرۋ تۋرالى شەشىم كوميسسيالىق تۇردە جانە ۇمىتكەرلەردىڭ بيزنەس-جوبالارىنىڭ پىسىقتالۋىن باعالاۋدىڭ ناقتى ولشەمشارتتارى نەگىزىندە قابىلدانادى.
كوميسسيا شەشىمى ۇمىتكەردىڭ پورتالداعى جەكە كابينەتىنە جىبەرىلەدى. كوميسسيانىڭ وڭ شەشىمى بولعان جاعدايدا، ۇمىتكەر بانك دەرەكتەمەلەرىن ۇسىنادى، شارتقا قول قويادى جانە ودان ءارى توقسان سايىن قاراجاتتىڭ پايدالانىلۋى تۋرالى ەسەپ بەرەدى. مۇنىڭ ءبارى حالىقتى جۇمىسپەن قامتۋ ورتالىقتارىنا بارماي-اق، ەلەكتروندىق فورماتتا جاسالادى.