قازاقستانداعى تۋريستىك قىزمەتتەردىڭ ساپاسىنىڭ ارتۋىنا ەلدىڭ ءار تۇرعىنى مەن ءار قوناعى ءوز ۇلەسىن قوسا الادى

ەلىمىزدە تۋريستەر ءوز ۇسىنىستارىن قالدىرا الاتىن ارنايى سايت قۇرىلدى.

ازاماتتار ۇسىنىستارى مەن شاعىمدارىن ارنايى سايتتا قالدىرا الادى. 

Shagym.kz پورتالى E-tourism جۇيەسىنە ەنگىزىلگەن، دەپ حابارلايدى Almaty-akshamy.kz Qazaqtv.com cايتىنا سىلتەمە جاساپ. 

سيفرلىق مودۋل سالا بويىنشا جۇمىس ىستەيتىن نىسانداردىڭ، تۋريستىك كومپانيالاردىڭ، جول بويىنداعى سەرۆيستەردىڭ، گيدتەردىڭ قىزمەتىن باعالاۋ ءۇشىن قۇرىلدى.

سايتتا شاعىم نە ءوتىنىش قالدىرۋ ءۇشىن تۋريست پورتالداعى ساۋالنامانى تولتىرىپ، ءوز ءسوزىنىڭ دالەلى رەتىندە فوتوسۋرەت تىركەۋگە ءتيىس. مالىمەتتەردى جۇيەنىڭ ءوزى تالدايدى. پايدالانۋشىلاردىڭ ەسكەرتۋلەرىن، شاعىمدارىن نەمەسە ۇسىنىستارىن مەملەكەتتىك ورگاندار، اكىمدىكتەر جانە بيزنەس بىرلەسە پىسىقتاپ، شەشىمىن ىزدەيتىن بولادى.

«Shagym.kz دەگەن سايت. كىرەسىز دە، ءوز شاعىمىڭىزدى نەمەسە ۇسىنىسىڭىزدى جازىپ، قاجەت دەسەڭىز، دالەل رەتىندە فوتوسۋرەتتەرىڭىزدى تىركەپ قويۋعا مۇمكىندىك بار. جۇيەدە ساناتتار جەكە-جەكە بولىنگەن: دارەتحانا، شەكارا، قوقىس، قوناق ءۇي، تۋروپەراتور، كولىك كومپانياسى دەگەن سياقتى. الماتىدا نە شىمكەنتتە مە، مالىمەتتەر جيناقتالىپ، ناقتى سول ايماقپەن جۇمىس جۇرگىزىلەدى. ولارعا حابارلاسىپ، ەسكەرتۋلەر تۋرالى ايتىپ، فوتودالەلدەرىن كەلتىرەمىز. سوندا اكىمدىكتەر پروبلەماعا نازار اۋدارادى»، - دەيدى «قازاق تۋريزم» ۇك اق باسقارما ءتوراعاسى تالعات امانبايەۆ.

.