قۇرامىندا كلەيكوۆيناسى جوعارى بيداي ۇلەسىنىڭ وسكەنى بايقالادى.
قازاقستاندا شامامەن 14،3 ملن توننا ءداندى جانە 200 مىڭ توننا مايلى داقىل جينالدى. ماماندار بيىلعى ەگىننىڭ استىعى جوعارى ساپالى كورسەتكىشتەرمەن سيپاتتالاتىنىن ايتتى، دەپ حابارلايدى Almaty-akshamy.kz.
«بيىل قازاقستاندا جينالاتىن ءداندى جانە مايلى داقىلدار الاڭى 18،9 ملن گەكتاردى قۇرادى. بۇل ونىمدەردىڭ جالپى ءتۇسىمىنىڭ بولجامدى كولەمى ناقتىلانعان دەرەكتەر بويىنشا شامامەن 18 ملن تونناعا جەتەدى. ورتاشا ونىمدىلىك گەكتارىنا 9،5 سەنتنەردەن اينالادى»، - دەدى اۋىل شارۋاشىلىعى ءمينيسترى ەربول قاراشوكەيەۆ ۇكىمەت وتىرىسى بارىسىندا.
21 قىركۇيەكتەگى جاعداي بويىنشا، شامامەن 14،3 ملن توننا ءداندى جانە 200 مىڭ توننا مايلى داقىل جينالدى. ءقازىر ماقسارى جيناۋ جۇمىستارى ءجۇرىپ جاتىر. ايماقتار جاپپاي بارلىق مايلى داقىلداردى جيناۋعا وسى ايدىڭ سوڭىندا كىرىسەدى.
مينيستر ءداندى جانە ءداندى-بۇرشاقتى داقىلدارعا جەكە توقتالدى. اۋىل شارۋاشىلىعى مينيسترلىگىنىڭ دەرەكتەرى بويىنشا، بيىل ءداندى جانە ءداندى-بۇرشاقتى داقىلدار 15،9 ملن گەكتار ەگىس القابىنان جينالادى. بۇل داقىلداردىڭ جالپى ءتۇسىمىنىڭ بولجامدى كولەمى شامامەن 16 ملن توننا. ورتاشا ونىمدىلىك گەكتارىنا 10،1 سەنتنەردەن اينالادى.
«وتكەن جىلدان قالعان استىقتى قوسا ەسەپتەگەندە ءداندى جانە ءداندى-بۇرشاقتى داقىلدار ءوندىرىسىنىڭ بيىلعى بولجامدى كولەمى ەلدىڭ ىشكى قاجەتتىلىكتەرىن تولىق قامتاماسىز ەتەتىنىن اتاپ وتكىم كەلەدى»، - دەدى ەربول قاراشوكەيەۆ.
بيداي مەن ۇن ەكسپورتى ورتا ازيا ەلدەرىنە، ءداستۇرلى تۇردە يران مەن اۋعانستان نارىعىنا باعىتتالاتىن بولادى. استىق ساپاسى جوعارى بولعاندىقتان، قىتايعا جونەلتىلەتىن بيداي كولەمى ارتۋى مۇمكىن.
جالپى، بيىل ەگىن جيناۋ جۇمىستارى ۋاقتىلى باستالدى. ناۋقان قارقىنى بىلتىرعىدان جوعارى. بۇگىنگى كۇنى 15،1 ملن گەكتار (95%) ەگىس القابىنداعى ءداندى جانە ءداندى-بۇرشاقتى داقىلدار جينالدى. وتكەن جىلدىڭ ءدال وسى كۇنى 14،5 ملن گەكتار القاپ (91،5%) جينالعان بولاتىن. بۇگىنگى تاڭدا ورتاشا ونىمدىلىك گەكتارىنا 9،4 سەنتنەردەن اينالىپ وتىر.
قازىرگى ۋاقىتتا كوكونىس، كارتوپ، باقشا داقىلدارى مەن ماقتا جيناۋ جۇمىستارى دا ءجۇرىپ جاتىر.
ءونىمنىڭ سانى مەن ساپاسىن تۇسىرمەي ساقتاۋدى قامتاماسىز ەتۋ ماسەلەلەرى ۆەدومستۆونىڭ باقىلاۋىندا. وتكەن جىلداردان قالعان استىق پەن بيىلعى ءونىمدى ساقتاۋعا مۇمكىندىك جەتكىلىكتى.
رەسپۋبليكادا سىيىمدىلىعى 29،3 ملن توننا بولاتىن استىق ساقتاۋ قويمالارى بار. ونىڭ ىشىندە استىق قابىلدايتىن كاسىپورىنداردا 12،4 ملن توننا، فەرمەرلەردە 16،9 ملن توننا استىق ساقتايتىن ورىن بار.
ليسەنزيالانعان استىق قابىلداۋ كاسىپورىندارىنا 1،9 ملن توننا استىق ءتۇستى، ونىڭ ىشىندە 1،67 ملن توننا بيداي، 163،9 مىڭ توننا ارپا جانە 56،4 مىڭ توننا وزگە دە داقىلدار (س ۇلى، تارى، قاراقۇمىق، كۇرىش).
«سونىمەن قاتار، اكىمدىكتەر بيىلعى استىقتى ەليەۆاتورلاردىڭ ۋاقتىلى قابىلداۋىنا ۇنەمى مونيتورينگ جۇرگىزىپ، استىقتىڭ ۇزدىكسىز جەتكىزىلۋىن قامتاماسىز ەتۋ ماسەلەسىن تۇراقتى باقىلاۋدا ۇستاۋى قاجەت»، - دەدى مينيستر.
مينيستر بيىلعى ەگىننىڭ استىعى جوعارى ساپالى كورسەتكىشتەرمەن سيپاتتالاتىنىن ايتتى. ليسەنزيالانعان استىق قابىلداۋ كاسىپورىندارىنا تاپسىرىلعان جۇمساق بيدايدىڭ جالپى كولەمىنىڭ 91%-ى 1-3 كلاستارعا جاتقىزىلعان. 2020 جىلى بۇل كورسەتكىش 83،8%-دى قۇراعان بولاتىن. 4-5 كلاستى جانە كلاسقا جاتپايتىن بيدايدىڭ ۇلەسى 2020 جىلى 16،2% بولعان. وعان قاراعاندا بيىل بۇل كورسەتكىش 9%-عا دەيىن تومەندەدى.
قۇرامىندا كلەيكوۆيناسى جوعارى بيداي ۇلەسىنىڭ وسكەنى بايقالادى. الەمدىك نارىقتا جوعارى سۇرانىسقا يە كلەيكوۆيناسى 28% جانە ودان جوعارى ساپالى Hi-Pro بيدايىنىڭ ۇلەسى وتكەن جىلى 59،7% بولسا، بيىل 71،3%-عا جەتتى.