2025 جىلدىڭ قاڭتار-قازان ايلارىندا قازاقستاندا جيھاز ءوندىرىسى 120،8 ملرد تەڭگەگە جەتتى.
بۇل وتكەن جىلدىڭ وسى كەزەڭىمەن سالىستىرعاندا اقشا كورسەتكىشى بويىنشا شامامەن 1،5 ەسە كوپ، ءتىپتى بيىلعى 10 ايداعى ءوندىرىس كولەمى 2024 جىلدىڭ تولىق جىلدىق كورسەتكىشىنەن 14،6% جوعارى، - دەپ حابارلايدى Aqshamnews.kz.
دەگەنمەن، Energyprom.kz مالىمەتىنە ساي، فيزيكالىق كولەم يندەكسى 99،9%-دى عانا كورسەتىپ وتىرعاندىقتان، ناقتى ماندە سەكتوردا ستاگناسيا بايقالادى.
ءوندىرىستىڭ جارتىسىنان كوبى الماتى قالاسى مەن الماتى، تۇركىستان وبلىستارىنا تيەسىلى بولدى. ايتا كەتەرلىگى، الماتى وبلىسىندا جيھاز ءوندىرىسى اقشا كورسەتكىشى بويىنشا وتكەن جىلدىڭ وسى كەزەڭىمەن سالىستىرعاندا 2،1 ەسە وسكەن.
ناقتى بىرلىكتەردە اعاشتان جاسالعان كەڭسە جيھازى 41،8%-عا ءوسىپ، 353،5 مىڭ داناعا جەتكەن. اعاش اسحانا مەن قوناق بولمەسىنىڭ جيھازى 24،5%-عا، مەتالل كاركاستى ارنايى وتىرعىش جيھاز 5%-عا ارتتى. ال اعاش جاتىن بولمە جيھازى (كەرەۋەت پەن شكافتان باسقا) 2 ەسەدەن كوپ قىسقاردى، ءاسۇي جيھازى 8،3%-عا ازايدى.
وتاندىق فابريكالار ءاسۇي جانە اعاشتان جاسالعان كەڭسە جيھازىنا ىشكى نارىق پەن ەكسپورتتى قوسقاندا سۇرانىستىڭ 71% جانە 83،1%-ىن قامتاماسىز ەتتى. ءاسۇي جيھازىنىڭ يمپورتى وتكەن جىلمەن سالىستىرعاندا ۇشتەن بىرگە قىسقارسا، اعاش كەڭسە جيھازىنىڭ يمپورتى 25%-عا تومەندەدى. ىشكى نارىقتا ءاسۇي جيھازىنىڭ ساتىلىمى 18،3%-عا قىسقارسا، كەڭسە جيھازى 25،2%-عا ءوستى.
ساۋدا كاسىپورىندارى ءۇشىن اعاش جيھاز ۇلەسى قىسقاردى: سۇرانىستىڭ تەك 7،4%-ىن وتاندىق ءوندىرىس قامتاماسىز ەتسە، يمپورت 18،8 ەسە ءوستى. اعاش اسحانا مەن قوناق بولمەسىنىڭ جيھازى بويىنشا وتاندىق ۇلەس 18،6%-عا جەتسە، يمپورت 11،7%-عا ازايدى، ىشكى نارىقتاعى ساتىلىم 6،5%-عا تومەندەدى.
مەتالل كاركاستى وتىرعىش جيھازعا سۇرانىستىڭ 39،6%-ىن، اعاش كاركاستى وتىرعىشقا 16،6%-ىن وتاندىق ءوندىرىس قامتاماسىز ەتتى. ىشكى نارىقتاعى ساتىلىم تەك مەتالل كاركاستى وتىرعىشتا 4%-عا ءوستى.
2025 جىلدىڭ قازان ايىندا جيھاز بەن تۇرمىستىق زاتتاردىڭ باعاسى ايىنا 0،3%، جىلىنا 8،2% ءوستى. جاتىن بولمە جيىنتىقتارى 8،7%-عا، ديۆان-كەرەۋەتتەر 8،5%-عا قىمباتتادى. ۇستەلدەر مەن ورىندىقتاردىڭ باعاسى سايكەسىنشە 8،3% جانە 7،3%-عا ءوستى.