قازاقستان رەسپۋبليكاسى ۇلتتىق بانكىنىڭ ۇلتتىق تولەم كورپوراسياسى (ۇتك) وڭىرلىك كوممۋنيكاسيالار قىزمەتىندە جىلدام ءارى ءقاۋىپسىز اۋدارىم مەن تولەم جاساۋ ءۇشىن بانكتەردىڭ باسىن قوسقان جاڭا ينفراقۇرىلىمدىق پلاتفورما – بانكارالىق ءموبيلدى تولەم جۇيەسىن (متج) كوپشىلىككە تانىستىردى، - دەپ حابارلايدى Aqshamnews.kz.
قازاقستاننىڭ ۇلتتىق بانكىمەن بىرلەسىپ قولعا العان بۇل باستاما ۇلتتىق سيفرلىق قارجى جۇيەسىنىڭ ماڭىزدى ەلەمەنتى بولىپ وتىر.
متج ەكى نەگىزگى قىزمەتتى قامتيدى:
• تەلەفون ءنومىرى ارقىلى بانكارالىق اۋدارىم (C2C – customer to customer)؛
• QR-كود ارقىلى بانكارالىق تولەم (C2B – customer to business).
تەلەفون ءنومىرى ارقىلى اقشا اۋدارۋ - پايدالانۋشىعا الۋشى تاراپتىڭ بانكىن كورسەتىپ، تەلەفون ءنومىرىن عانا جازىپ اقشا جىبەرۋگە مۇمكىندىك بەرەدى. ممتج ارقىلى جىبەرۋشى بانك شوتتىڭ بار-جوعىن تەكسەرىپ، اۋدارىمدى ءبىرىڭعاي بانكارالىق ستاندارتتار بويىنشا ىسكە اسىرادى.
بانكارالىق اۋدارىم العاش 2025 جىلدىڭ مامىرىندا جاسالدى. ءقازىر بۇل قىزمەتكە 8 بانك قوسىلعان. ولار: Halyk Bank، بانك سەنتركرەديت، Freedom Bank، Home Credit Bank، RBK، نۇربانك، Fortebank پەن Altyn Bank.
بانكارالىق QR 2025 جىلى 30 قىركۇيەكتە ىسكە قوسىلدى. ءقازىر بۇل قىزمەتككە 6 بانك قوسىلىپ وتىر. ولار: بانك سەنتركرەديت، Freedom Bank، Home Credit Bank، RBK مەن Altyn Bank. Halyk Bank پيلوتتىق رەجيمنەن وتكىزىپ جاتىر، جىل سوڭىنا دەيىن تولىق ىسكە قوسىلادى دەپ جوسپارلانىپ وتىر.
«سەرۆيس كەز كەلگەن بانكتىڭ ءموبيلدى قوسىمشاسى ارقىلى تاۋار مەن قىزمەتتى تولەۋگە مۇمكىندىك بەرەدى. بيزنەس ەندى بىرنەشە تەرمينال ورناتىپ اۋرە بولمايدى بۇرىنعىداي. جۇيە ديناميكالىق جانە ستاتيكالىق QR-دى قولدايدى، سىلتەمەلىك فورمات پەن انتيفرود قورعانىسىن دا قولدانادى، بۇل رەكۆيزيتتەردىڭ اۋىسىپ كەتۋىنە دە جول بەرمەيدى»، – دەيدى ۇتك تولەم جۇيەسىن دامىتۋ دەپارتامەنتىنىڭ ديرەكتورى رايىمبەك شايمەردەنوۆ.
جۇيەنىڭ ەكونوميكا مەن ازاماتتارعا بەرەتىن ارتىقشىلىعى:
• ىڭعايلىلىق پەن جىلدامدىق. بانككە تاۋەلدى بولماي، تەلەفون ءنومىرى مەن QR-كود ارقىلى وپ-وڭاي تولەم جاساپ، اقشا اۋداراسىز.
• سيفرلىق ەكونوميكانىڭ ءوسۋى. جۇيە اقشا اينالىمىن تەزدەتىپ، قولما-قول اقشاعا تاۋەلدىلىكتى ازايتادى، اسىرەسە شوب-كە ءتيىمدى.
• بانك باسەكەلەستىگىن دامىتۋ. بانكتەر كليەنتتىڭ ادالدىعىن ارتتىرىپ، ترانزاكسيا بازاسىن كەڭەيتىپ، جاڭا سيفرلىق ءونىم جاساي باستايدى.
• قارجىلىق قولجەتىمدىلىك جانە قاۋىپسىزدىك. جۇيە تولەم قىزمەتىنە تەڭ قولجەتىمدىلىكتى قامتاماسىز ەتەدى، انتيفرود-باقىلاۋ ارقىلى الاياقتىقتى تىيىپ، اقشاسىز ەكونوميكاعا كوشۋدى قولدايدى.
«قازاقستان بانكتەرى جۇيەگە كەزەڭ-كەزەڭىمەن قوسىلا باستايدى ەندى، بۇل ودان دا كوپ كليەنتتىڭ ىڭعايلى ءارى ءقاۋىپسىز بانكارالىق تولەم مەن اۋدارىم جاساۋىنا سەپ بولادى»، – دەيدى ۇلتتىق تولەم كورپوراسياسىنىڭ ماماندارى.