بۇل تۋرالى ءماجىلىستىڭ جالپى وتىرىسىندا ۇلتتىق ەكونوميكا ءمينيسترى الىبەك قۋانتىروۆ ايتتى.
بۇگىن پالاتانىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ جەكەلەگەن تاپسىرمالارىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا قارالدى. قۇجاتتا بيۋدجەتارالىق ماسەلەلەر ەسكەرىلگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بيۋدجەتارالىق قاتىناستاردى ودان ءارى رەفورمالاۋ جونىندەگى جۇمىس جۇرگىزىلۋدە. رەفورمانىڭ نەگىزگى ماقساتى – وڭىرلەردىڭ قارجىلىق دەربەستىگىن كۇشەيتۋ. سالىق تۇسىمدەرىنىڭ كەيبىر تۇرلەرىن، ياعني ولاردىڭ تۇراقتىلىعى مەن جيناقتالۋ قاعيداتتارىن ەسكەرە وتىرىپ، جەرگىلىكتى دەڭگەيگە بەرۋ ۇسىنىلادى»، - دەدى ءا. قۋانتىروۆ.
بۇدان باسقا زاڭ جوباسىندا جالپى سيپاتتاعى ترانسفەرتتەردىڭ ەسەپتەۋلەرىنە بەرىلەتىن اقپاراتتىڭ انىقتىعى ءۇشىن بيۋدجەتتىك باعدارلامالار اكىمشىلەرىنىڭ جاۋاپكەرشىلىگى قاراستىرىلعان.
سونىمەن قاتار، مەملەكەتتىڭ ەكونوميكالىق فۋنكسيالارىن جەكە مونوپوليالىق وپەراتورلاردىڭ جۇزەگە اسىرۋىنا زاڭ جۇزىندە تىيىم سالۋ جونىندەگى تاپسىرمانى ىسكە اسىرۋ قاراستىرىلعان. بۇل تۇرعىدا مەملەكەت 100% قاتىساتىن زاڭدى تۇلعالار عانا مونوپوليالىق فۋنكسيالاردى جۇزەگە اسىرا الاتىن تۇزەتۋلەر ۇسىنىلدى.
«دەمەك ارنايى قۇقىق سۋبەكتىسى ۇعىمى ناقتىلانادى جانە مەملەكەتتىك مونوپوليا مەن ارنايى قۇقىقتى قوسپاعاندا، ايرىقشا ءارى باسىم قۇقىقتاردى بەرۋگە تىيىم سالىنادى»، - دەدى مينيستر.