سامات ابىشكە قاتىستى قوزعالعان ەشقانداي قىلمىستىق ءىس جوق.
ورتالىق كوممۋنيكاسيالار قىزمەتىندە ىشكى ىستەر ءمينيسترى مارات احمەتجانوۆ جۋرناليستەر سۇراعىنا جاۋاپ بەردى، دەپ حابارلايدى Almaty-akshamy.kz Almaty.tv سىلتەمە جاساپ.
ولار مينيستردەن ۇلتتىق قاۋىپسىزدىك قىزمەتىندە جۇمىس ىستەگەن بۇرىنعى پرەزيدەنتتىڭ تۋىسى سامات ءابىش پەن ىشكى ىستەر مينيسترلىگىنىڭ بۇرىنعى باسشىسى ەرلان تۇرعىمبايەۆقا قاتىستى ىستەر قاشان قارالاتىنى جونىندە سۇرادى.
«ىشكى ىستەر ورگاندارىندا ولارعا قاتىستى ەشقانداي شارالار تىركەلمەگەن. سوندىقتان ءبىزدىڭ وندىرىستە نە تۇرعىمبايەۆقا، نە سامات ابىشكە قاتىستى قوزعالعان ەشقانداي قىلمىستىق ءىس جوق»، - دەپ جاۋاپ بەردى مارات احمەتجانوۆ.
سونىمەن قاتار، مينيستر قاڭتار وقيعاسى كەزىندەگى ادامداردى ازاپتاعان پوليسەيلەر جونىندەگى جۋرناليستەر سۇراعىنا جاۋاپ بەرە المادى. مارات احمەتجانوۆ بولجام رەتىندە نەمەسە ەستىگەنىن ايتىپ، ناقتىلانباعان اقپاراتپەن بولىسپەيتىنىن، بۇل ىستەر ونىڭ قۇزىرەتىنە جاتپايتىنىن العا تارتتى.
«بۇل ءبىزدىڭ وندىرىسىمىزدە ەمەس. ول پوليسەيلەرگە قاتىستى قانداي شارا قولدانۋ كەرەك، ولار قاماقتا ما، باسقادا ما، ونى قۇزىرلى ورگان شەشەدى. ولاردىڭ وندىرىسىندە ءوز تەرگەۋشىسى بار، قاداعالايتىن پروكۋرور بار. ازاماتتاردىڭ پروسەسسۋالدىق قۇقىعىن شەكتەيتىن ىس-ارەكەتتەر پروكۋراتۋرا قۇزىرەتىندە. سول ءۇشىن دە ەشقانداي بولجام ايتا المايمىن»، - دەدى ول.