ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ۇكىمەت وتىرىسىندا قۇرىلىس ماتەريالدارىنىڭ يمپورتىن قالاي ازايتۋعا بولاتىنىن ايتتى، دەپ حابارلايدى اlmaty-akshamy.kz
«جىل قورىتىندىسى بويىنشا، قۇرىلىس ماتەريالدارىنىڭ ءوندىرىسى 9،8 %-عا ءوسىپ، 902،7 ملرد. تەڭگە بولدى. وڭدەۋشى ونەركاسىپ قۇرىلىمىنداعى سالانىڭ ۇلەسى شامامەن 5،5 %-دى قۇرايدى. سالادا 2472 كاسىپورىن جۇمىس ىستەيدى، ولاردا شامامەن 26،2 مىڭ ادام جۇمىس ىستەيدى»، - دەگەن مينيستر جالپى قۇرىلىس ماتەريالدارىنىڭ ىشكى نارىعى 2،7 ملرد دوللاردى قۇراعانىن، ونىڭ ىشىندە وتاندىق ءوندىرىستىڭ ۇلەسى 57%، ال يمپورت 43% بولعانىن ايتتى.
«كورىپ وتىرعانىمىزداي، قازاقستاندىق وندىرۋشىلەر ىشكى نارىقتىڭ بەتون، سەمەنت، قابىرعا ماتەريالدارى سياقتى بازالىق قۇرىلىس ماتەريالدارىنا قاجەتتىلىگىن تولىق كولەمدە جابادى. بارلىق جەردە قۇرىلىستا جانە جوندەۋ كەزىندە تەك قازاقستاندىق گيپسوكارتون مەن قۇرعاق قۇرىلىس قوسپالارى قولدانىلادى. الايدا، يمپورتقا تاۋەلدى قۇرىلىس ماتەريالدارى ارلەۋ سەگمەنتىنىڭ قوسىلعان قۇنى جوعارى تاۋارلار بولىپ وتىر. ادەتتە، بۇل ارلەۋ ماتەريالدارى، تۇسقاعازدار، لينولەۋم، جىلۋ وقشاۋلاعىش ماتەريالدار، سانفايانس جانە شىنى بۇيىمدارى»، - دەدى قايىربەك وسكەنبايەۆ.
سونداي-اق، ول جاقىن ارادا 8 616 جاڭا جۇمىس ورنىن قامتاماسىز ەتەتىن، جالپى قۇنى 601،3 ملرد تەڭگە بولاتىن 35 يمپورتتى الماستىرۋ جوباسى قولعا الىناتىنىن ءمالىم ەتتى.
«سانفايانس، قىش تاقتايلار، مينەرالدىق جىلىتقىشتار، اعاش سۇرەكتى تاقتالار سياقتى وتاندىق قۇرىلىس تاۋارلارىمەن قامتاماسىز ەتۋ بويىنشا جاڭا وندىرىستەردى اشۋ كوزدەلىپ وتىر.
بۇل جوبالاردى ەنگىزۋ ىشكى نارىقتاعى يمپورت ۇلەسىن شامامەن 60%-عا تومەندەتۋگە مۇمكىندىك بەرەدى جانە قۇرىلىس ماتەريالدارى باعاسىنىڭ اۋىتقۋىن بولدىرمايدى»، - دەدى ۆەدومستۆو باشىسى.
ايتۋىنشا، اتالعان جاڭا جوبالار ىسكە اسسا، 2025 جىلعا قاراي 700 ملن دوللار بولاتىن 10-نان استام ءونىم وزىمىزدە وندىرىلە باستايدى.
«تاۋار پوزيسيالارى بولىنىسىندە مىناداي قۇرىلىس ماتەريالدارى – تەمىربەتون بۇيىمدار، بەتون، قۇرعاق قوسپالار، لاك بوياۋ، كىرپىشتەر، شىنى، كابەلدەر، اعاش-سۇرەكتى تاقتالار جانە قاسبەتتىك تاقتالار بويىنشا ىشكى نارىقتى 100% جابۋ جوسپارلانعان.
سونداي-اق، يمپورتقا تاۋەلدى قۇرىلىس ماتەريالدارى -اليۋمينيي رادياتورلارى، پوليەتيلەن قۇبىرلارى، شاتىر ماتەريالدارى، رادياتورلار، مەتالل جابىندار، ەسىك بلوكتارى، قىش تاقتالار، سانفايانس جانە ارماتۋرا بويىنشا ىشكى نارىقتىڭ 50 %-دان استامىن جابۋ جوسپارلانعان»، - دەدى مينيستر.