ولار ءوزارا ءىس-قيمىل جاساسۋ ماسەلەلەرىن تالقىلادى.
قازاقستاننىڭ اقپارات جانە قوعامدىق دامۋ ءمينيسترى اسقار ۋماروۆ ءدىني باسقارما وكىلدەرىمەن كەزدەسىپ، اڭگىمەلەستى، دەپ حابارلايدى Almaty-akshamy.kz.
«باس ءمۇفتي ناۋرىزباي قاجى تاعان ۇلىنىڭ شاقىرۋىمەن اقپارات جانە قوعامدىق دامۋ ءمينيسترى اسقار ۋماروۆ قازاقستان مۇسىلماندارى ءدىني باسقارماسىنىڭ ايماقتىق يمامدارىمەن كەزدەستى. مينيسترلىك پەن قمدب-نىڭ ءوزارا ءىس-قيمىل جاساسۋ ماسەلەلەرى بويىنشا سىندارلى پىكىر الماسۋ بولدى. ءدىني قىزمەتكەرلەر مينيسترگە وزەكتى ساۋالدارىن قويدى جانە قوعامدا راديكالدى ءدىني يدەولوگيانىڭ تارالۋىنا قارسى ءىس-قيمىل ماسەلەلەرى كەڭىنەن تالقىلاندى»، - دەلىنگەن مينيسترلىكتىڭ باسپا ءسوز قىزمەتىنىڭ حابارلاماسىندا.
ءوز سوزىندە اسقار ۋماروۆ قازاقستان مۇسىلماندارى ءدىني باسقارماسى يمامدارىنىڭ جاستاردى رۋحاني قۇندىلىقتار مەن ادامگەرشىلىككە تاربيەلەۋدە، سونداي-اق ەل مۇسىلماندارىن دەسترۋكتيۆتى سيپاتتاعى ءتۇرلى كوزقاراستاردىڭ اسەرىنەن قورعاۋداعى ۇلكەن ءرولىن اتاپ ءوتتى.
«قاسىرەتتى قاڭتار» وقيعاسى كەزىندە باس مۋفتيدەن باستاپ، قمدب-نىڭ وڭىردەگى باس يمامدارى حالىقتى سابىر مەن تىنىشتىققا شاقىرۋ بويىنشا تاباندى ەڭبەك ەتكەندەرىڭىز ءۇشىن، سىزدەرگە ءوزىمنىڭ شىنايى العىسىمدى بىلدىرەمىن. بۇل ەل الدىندا بارشامىزعا جۇكتەلگەن جاۋاپكەرشىلىگى جوعارى ىس-ارەكەت دەپ تانيمىن»، - دەدى مينيستر.
ءوز كەزەگىندە باس ءمۇفتي ناۋرىزباي قاجى تاعان ۇلى قازاقستان مۇسىلماندارى ءدىني باسقارماسى بيىل «يسلام – بەيبىتشىلىك پەن ىنتىماقتاستىق ءدىنى» تاقىرىبى بويىنشا اقپاراتتىق-اعارتۋشىلىق جۇمىستىڭ جەتى باعىتى بويىنشا ءىس-قيمىل باعدارلاماسىن قابىلداعانىن ايتتى.
كەزدەسۋ قورىتىندىسى بويىنشا قاتىسۋشىلار جاھاندىق ترەندتەرگە سايكەس اعارتۋشىلىق قىزمەتتەگى ءوزارا ءىس-قيمىلدى ارتتىرۋعا جانە اقپاراتتى تاراتۋدىڭ ءتيىمدى ادىستەرىن پايدالانۋعا دايىن ەكەندىكتەرىن ءبىلدىردى.