پرەمەر-مينيستر ءاليحان سمايىلوۆ كادرلار تاپشى وڭىرلەرگە ۇستازداردى تارتۋ ءۇشىن قوسىمشا اقى تولەۋ شاراسىن قاراستىرۋ كەرەگىن ايتتى، دەپ حابارلايدى اlmaty-akshamy.kz
مەملەكەت باسشىسى جوعارى، اسىرەسە، تەحنيكالىق جوعارى ءبىلىمدى دامىتۋعا ەرەكشە نازار اۋدارۋدى تاپسىردى. يندۋستريالاندىرۋ مەن سيفرلاندىرۋ جاعدايىندا ءبىرىنشى كەزەكتە زاماناۋي تاسىلدەر مەن داعدىلاردى مەڭگەرگەن ساۋاتتى تەحنيكالىق ماماندار قاجەت. جوعارى ءبىلىم بەرۋ جۇيەسىن قايتا قاراۋ وتاندىق ۋنيۆەرسيتەتتەردىڭ باسەكەگە قابىلەتتىلىگىن ارتتىرۋ، جوعارى ءبىلىمدى ۇرپاقتىڭ جاڭا بۋىنىن تاربيەلەۋ ءۇشىن قاجەت. بۇل باعىتتاعى جۇمىستى جەدەلدەتىپ، تانىمال ۋنيۆەرسيتەتتەردىڭ فيليالدارىن، كامپۋستارىن اشۋ ىسىندە ناقتى شارالار قابىلداۋ كەرەك، - دەپ ايتتى ول.
ايتۋىنشا، جاستاردىڭ جوعارى ءبىلىم الۋ مۇمكىندىگىن كەڭەيتۋ ءۇشىن مەملەكەتتىك تاپسىرىس كولەمىن ۇلعايتۋ، ونىڭ ىشىندە ەلىمىزدىڭ باتىس وڭىرلەرىنىڭ ستۋدەنتتەرى ءۇشىن تەحنيكالىق ماماندىقتار بويىنشا قوسىمشا 10 مىڭ گرانت ءبولۋ جوسپارلانىپ وتىر.
جالپى، جوعارى ءبىلىم سالاسىندا گرانتتار ارقىلى مەملەكەتتىك تاپسىرىستاردى ءبولۋ كەزىندە ءبىلىم مينيسترلىگى مەن اكىمدىكتەر وڭىرلەردىڭ ەرەكشەلىكتەرى مەن وبلىستارداعى كادرلارعا دەگەن قاجەتتىلىكتى ەسكەرۋى ءتيىس. تەحنيكالىق عىلىمداردى دامىتۋعا باسىمدىق بەرۋ، «E-lab» ءبىرىڭعاي پلاتفورماسىن قۇرۋ، عىلىمدى بازالىق قارجىلاندىرۋدى كەڭەيتۋ ارقىلى عىلىمي ينفراقۇرىلىمدى جاڭعىرتۋ جونىندەگى شارالار كەشەنىن قاراستىرۋ قاجەت، - دەدى ءاليحان سمايىلوۆ.
وسى رەتتە ۇكىمەت باسشىسى ءبىلىم مينيسترلىگىنە بىرنەشە تاپسىرما بەردى.
ءبىرىنشى. پرەزيدەنت تاپسىرمالارىنا سايكەس، «ءبىلىمدى ۇلت» ساپالى ءبىلىم بەرۋ» ۇلتتىق جوباسىن تەز ارادا قايتا قاراۋ كەرەك.
ەكىنشى. ۇلتتىق ەكونوميكا، قارجى مينيسترلىكتەرىمەن بىرلەسىپ، ۇكىمەتتىڭ 2022 جىلعا ارنالعان ءىس-قيمىل باعدارلاماسىنىڭ جوباسىنا بالالاردى بالاباقشاعا كەزەككە قويۋدىڭ ءبىرىڭعاي سيفرلىق بازاسىن قۇرۋ، تاربيە جۇمىسى تۇجىرىمداماسىن قابىلداۋ، قوسىمشا ءبىلىم بەرۋدىڭ ءبىرىڭعاي ۇلتتىق پورتالىن قۇرۋ جونىندەگى ءىس-شارالاردى ەنگىزۋدى قامتاماسىز ەتۋ قاجەت.
ءۇشىنشى. كاسىپورىنداردىڭ كوللەدجدەردى قامقورلىققا الۋىن دامىتۋ جونىندەگى كەشەندى جوسپاردىڭ جوباسىن پىسىقتاپ، وسى جىلعى 10 اقپانعا دەيىن ەنگىزسىن.
ءتورتىنشى. جەتەكشى شەتەلدىك جوعارى وقۋ ورىندارىنىڭ فيليالدارىن اشۋ جونىندەگى جول كارتاسىن وسى جىلعى 7 اقپانعا دەيىن ەنگىزۋ كەرەك.
بەسىنشى. سالالىق مەملەكەتتىك ورگاندارمەن بىرلەسىپ، تەحنيكالىق باعىتتاعى عىلىمي كادرلاردى دايارلاۋعا باسىمدىق بەرۋ قاجەت، ونىڭ ىشىندە جاس عالىمدارعا گرانتتار ءبولۋ جانە جىل سايىن جەتەكشى شەتەلدىك عىلىمي ورتالىقتارعا جىبەرۋ جۇمىستارىنىڭ اياسىندا دا ۇيىمداستىرۋ كەرەك.