بيۋدجەت ەسەبىنەن تۇماۋعا قارسى ۆاكسينانىڭ 2،3 ملن دوزاسى ساتىپ الىنعان.
دەنساۋلىق ساقتاۋ ۆيسە-مينيسترى - ق ر باس مەملەكەتتىك سانيتارلىق دارىگەرى ايجان ەسماعامبەتوۆا وكق كۋلۋارىندا حالىقتى تۇماۋعا قارسى ۆاكسيناسيالاۋ ناۋقانى قاشان باستالاتىنىن ايتتى، دەپ حابارلايدى Almaty-akshamy.kz Egemen.kz سىلتەمە جاساپ.
ايجان ەسماعامبەتوۆا 1 قازاننان باستاپ ەلدە تۇماۋعا قارسى ۆاكسيناسيا ناۋقانى باستالاتىنىن ەسكە سالدى.
«جىل سايىن ەپيدەميالىق ماۋسىمنىڭ باستالۋىنا دەيىن ءبىز ۆاكسيناسيا ناۋقانىن وتكىزەمىز. وسىلايشا ادامداردىڭ يممۋنيتەتى نىعايا تۇسەدى»، - دەدى ۆيسە-مينيستر.
ايجان ەسماعامبەتوۆانىڭ مالىمەتىنشە، بيۋدجەت ەسەبىنەن تۇماۋعا قارسى ۆاكسينانىڭ 2،3 ملن دوزاسى ساتىپ الىندى. 20-25 قىركۇيەككە دەيىن ۆاكسينالاردى ايماقتارعا ءبولىپ جەتكىزۋ اياقتالادى.
كەلەسى ساناتتاعى ادامدار بيۋدجەت قاراجاتى ەسەبىنەن ەگىلەدى:
- ءجيى اۋىراتىن بالالار؛
- ديسپانسەرلىك ەسەپتە تۇرعان بالالار؛
- 60 جاستان اسقان، جابىق مەديسينالىق-الەۋمەتتىك مەكەمەلەردەگى ادامدار؛
- جۇكتى ايەلدەر.
«تۇرعىندار ءوز قاراجاتى ەسەبىنەن ەكپە سالدىرا الادى. ورتاشا العاندا، وتكەن جىلعى باعا ايتارلىقتاي وزگەرگەن جوق. بىلتىر بۇل شامامەن 3 مىڭ تەڭگە بولاتىن، بيىل ءبىز جەكە سەكتوردا بۇل ۆاكسينانىڭ قانشا تۇراتىنىن ءالى بىلمەيمىز»، - دەپ تولىقتىردى ايجان ەسماعامبەتوۆا.