ءماجىلىس دەپۋتاتى دارحان مىڭبايدىڭ ايتۋىنشا، نەكە سانىنىڭ قىسقارۋى جانە اجىراسۋ فاكتىلەرىنىڭ ءوسۋى جۇيەلى تۇردە تىركەلىپ وتىر.
اجىراسۋدىڭ كوپ بولىگى 30-34 جاس ارالىعىنداعى جاس وتباسىلارعا تيەسىلى، دەپ حابارلايدى Almaty-akshamy.kz
دەپۋتات وتباسىلاردىڭ اجىراسۋىن بولدىرماۋ ءۇشىن مەكتەپتەر مەن جوعارى وقۋ ورىندارىندا ارنايى ساباقتار ەنگىزۋدى ۇسىندى.
«وتباسى جانە رەسمي ستاتيستيكا تۋرالى ۇلتتىق باياندامانىڭ دەرەكتەرى بويىنشا 2015 جىلدان باستاپ 2019 جىلعا دەيىنگى كەزەڭدە تىركەلگەن نەكەنىڭ جالپى سانى 709،6 مىڭ، ال اجىراسقان وتباسىلار – 274،5 مىڭ بولدى. ياعني تىركەلگەن نەكەمەن سالىستىرعاندا اجىراسۋلار سانى 35%-تەن 43%-كە دەيىن ءوستى. دەمەك، كەيىنگى 5 جىلدا كۇنىنە 389 نەكە تىركەلىپ، 150 وتباسى اجىراسقان»، – دەدى ماجىلىسمەن.
ول 2019 جىلدىڭ قورىتىندىسى بويىنشا 59 796 نەكە بۇزىلعانىن، ياعني ءبىر كۇندە 164 وتباسى اجىراسقانىن اتاپ ءوتتى.
«سول جىلى 120 مىڭعا جۋىق ادام نەكەنى بۇزدى، ولاردىڭ ءارقايسىسى ەكىنشى، ياعني 60 مىڭنان استامى (60 324 جاس – 50،5%) – 18-35 جاسقا دەيىنگى جاستار. اجىراسۋدىڭ كوپ بولىگى 30-34 جاس ارالىعىنداعى جاس وتباسىلارعا تيەسىلى (23،3%)»، - دەيدى دەپۋتات.