رەپرەسسيا قۇرباندارى تۋرالى جيناق شىقپاق

ەلدە جىل سوڭىنا دەيىن ساياسي قۋعىن-سۇرگىنگە ۇشىراعان تۇلعالار جايلى جيناق جارىققا شىعادى

بۇل تۋرالى ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ مۇشەسى سابىر قاسىموۆ ءبىزدىڭ ارناعا بەرگەن سۇحباتىندا ايتتى، دەپ حابارلايدى Almaty-akshamy.kz 24.kz-كە سىلتەمە جاساپ.

ونىڭ ايتۋىنشا، كىتاپتا قازاقستاندىق عىلىم، مادەنيەت جانە ساياسات سالاسىنىڭ زيالى قاۋىم وكىلدەرى  مەن قوسا باسقا دا ازاماتتار جايلى تىڭ دەرەكتەر دە بار.

«كەزىندە جازىقسىز جازالانعان تۇلعالاردىڭ ۇرپاقتارىن ىزدەيمىز»،– دەدى ول.

الداعى ۋاقىتتا زۇلمات زاماندا قۇدالاۋعا ۇشىراعان ءجۇز مىڭنان استام ادامنىڭ قۇجاتى جينالىپ، زەرتتەلىپ، ارحيۆتەر جيناقتالادى.

«بۇرىن ولاردىڭ ءبارى قۇپيا بولعان. ونىڭ ءبارىن ساراپتاپ، زاڭگەرلەردى تارتىپ جاتىرمىز. ەكسپەرتيزا جۇرگىزەدى. سول اكتىلەردەن زارداپ شەككەندەردى اقتايمىز. جاڭا زاڭ قابىلدايمىز. قازىرگى زاڭدارعا وزگەرىس ەنگىزەمىز. قۇپيا بولىپ جاتقان فوندتاردى اشىپ جاتىرمىز. ۇقك جۇزدەن استام ءىستى اشتى»، - دەدى ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ مۇشەسى سابىر قاسىموۆ.