ەلىمىزدە ءبىلىم بەرۋ ۇيىمدارىن مەملەكەتتىك اتتەستاتتاۋ فورماتى وزگەرىپ كەلەدى.
ەندى اتتەستاتتاۋ باقىلاۋ شاراسى ەمەس، ءبىلىم بەرۋ ساپاسى مەن قولجەتىمدىلىگىن كەشەندى باعالاۋ رەتىندە جۇزەگە اسىرىلادى. ءتيىستى وزگەرىستەر زاڭنامالىق دەڭگەيدە بەكىتىلدى، دەپ حابارلايدى Aqshamnews.kz
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت، ءبىلىم بەرۋ، وتباسى جانە مەملەكەتتىك باقىلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا سايكەس مەملەكەتتىك باقىلاۋ فۋنكسيالارى مەن ءبىلىم بەرۋ ۇيىمدارىنىڭ قىزمەتىن باعالاۋ تەتىكتەرىن اجىراتۋ ماقساتىندا مەملەكەتتىك اتتەستاسياعا قاتىستى نورمالار قايتا ناقتىلانىپ، «ءبىلىم تۋرالى» زاڭعا وزگەرىستەر ەنگىزىلدى.
«ءبىلىم بەرۋ ۇيىمدارىن اتتەستاتتاۋ – ءبىلىم ساپاسى مەن قولجەتىمدىلىگىن باعالاۋعا، سونداي-اق مەملەكەتتىك جالپىعا مىندەتتى ستاندارت تالاپتارىنا سايكەستىگىن ايقىنداۋعا باعىتتالۋدا. مۇنداعى ماقسات ءبىلىم بەرۋ ۇيىمدارىنىڭ جۇمىس تيىمدىلىگىن ارتتىرۋ مەن وقۋ پروسەسىن جەتىلدىرۋ بولىپ تابىلادى»، – دەيدى ءبىلىم سالاسىندا ساپانى قامتاماسىز ەتۋ كوميتەتىنىڭ ءتورعاسى سەرىك ءاشىروۆ.
ايتا كەتەيىك، جىل باسىنان بەرى وقۋ-اعارتۋ مينيسترلىگىنىڭ ءبىلىم سالاسىندا ساپانى قامتاماسىز ەتۋ كوميتەتىنىڭ اۋماقتىق دەپارتامەنتتەرىمەن 2700 ءبىلىم بەرۋ ۇيىمى مەملەكەتتىك اتتەستاتتاۋدان ءوتتى.