الماتى قالاسى قوعامدىق دامۋ ورتالىعى قىزمەتكەرلەرى «Batyl Bol» قازاق ءتىلىن ۇيرەتۋ ورتالىعىنا بارىپ، جوبا نەگىزىن قالاۋشى الەكسەي سكaلوزۋبوۆپەن كەزدەسۋ وتكىزدى. ا.سكaلوزۋبوۆ قازاق ءتىلىن قالاي ۇيرەنگەنىن جانە كلۋبتى قۇرۋ يدەياسى قايدان كەلگەنىمەن ءبولىسىپ، جەكە قىزىعۋشىلىعىن قوعامدىق ماڭىزى بار باستاماعا اينالدىرۋ جولىن بايان ەتتى.
قازاق ءتىلىن ۇيرەتۋدىڭ ەركىن ءارى تەگىن فورماتى بۇگىنگى قوعام ءۇشىن ناعىز قاجەت قۇبىلىس. «Batyl Bol» ءتىل كلۋبى الماتىداعى جۇزدەگەن ادامنىڭ تىلدىك داعدىسىن دامىتىپ، قازاقشا سويلەيتىن ۇلكەن قاۋىمداستىق قۇرۋعا اتسالىسىپ جۇرگەن ءتىل ورتالىقتارىنىڭ ءبىرى. جوبا نەگىزىن قالاعان الەكسەي سكالوزۋبوۆتىڭ باستى ماقساتى – قالا تۇرعىندارىنا قىمبات كۋرسقا جازىلماي-اق، ىڭعايلى ۋاقىتتا مەملەكەتتىك ءتىلدى مەڭگەرۋگە مۇمكىندىك بەرەتىن اشىق الاڭ قۇرۋ.
بۇل باستاما قالاعا جاڭا كەلگەن جاس ستۋدەنتتىڭ ىزدەنىسىنەن تۋعان. الماتىعا العاش كەلگەندە اعىلشىن تىلىندەگى تەگىن سويلەسۋ كلۋبتارىنا قاتىسىپ، نەبارى التى ايدا ەركىن سويلەپ كەتكەن الەكسەي سكالوزۋبوۆ سول تاجىريبەنى قازاق تىلىنە بەيىمدەۋدى ويلايدى. وسىلايشا، 2022 جىلدىڭ 15 ساۋىرىندە العاشقى قازاقشا سويلەسۋ كلۋبى اشىلدى. كلۋبقا ەكى كۇن ىشىندە 300-دەن استام ادام تىركەلىپ، جوبا ءتىل ۇيرەنۋشىلەر اراسىندا ۇلكەن سۇرانىسقا يە بولدى.
الەكسەيدىڭ ايتۋىنشا، ساپالى تىلدىك ورتانى قالىپتاستىرۋدىڭ ءوز شارتى بار. تۇراقتى وقىتۋشىلار، جۇيەلى ساباق جانە ماقساتتى اۋديتوريا. قاتىسۋشىلاردىڭ باسىم بولىگى – 25 پەن 35 جاس ارالىعىنداعى جاستار. دەگەنمەن كلۋبقا وقۋشىدان زەينەتكەرگە دەيىنگى ءتۇرلى اۋديتوريا قاتىسادى. سونىمەن قاتار «Batyl Bol» كلۋبىندا قازاقستاننىڭ ءار وڭىرىنەن جينالعان ءتۇرلى ۇلت وكىلدەرى باس قوسادى. ءتىپتى رەسەي مەن اقش-تان كەلگەن شەتەل ازاماتتارى دا بار. ءبىراق ءبارىن بىرىكتىرەتىن ءبىر-اق نارسە – قازاق ءتىلىن ۇيرەنۋگە دەگەن ىقىلاس.
الەكسەي ءتىل ۇيرەنۋگە ەڭ ۇلكەن كەدەرگى – ءتارتىپ پەن تۇراقتىلىقتىڭ جەتىسپەۋى ەكەنىن ايتادى:
- الدىمەن، ءتارتىپ. كوپ ادام قازاق تىلىندە ەركىن سويلەگىسى كەلەدى، ءبىراق ۇيرەنگىسى كەلمەيدى. قىركۇيەك ايىندا وقۋ كۋرسىنا 150 ادام تىركەلسە، 30 ادام سويلەسۋ توبىنا قوسىلعان. ءقازىر ديسيپليناسى مىقتى 70 ادام قالدى. ناتيجە تەك ديسيپلينا مەن ەڭبەك بار جەردە شىعادى.
ساباقتاردىڭ مازمۇنى كۇندەلىكتى ومىرگە نەگىزدەلگەن: تۇرمىستىق جاعداياتتار، قاتىسۋشىلاردىڭ قىزىعۋشىلىقتارى، جەكە تاجىريبەلەر. مۇنداي فورمات ءتىل ۇيرەنۋشىلەردىڭ وزدەرىن ەركىن سەزىنىپ، قازاق ءتىلىن تابيعي ورتادا تەز قولدانىسقا ەنگىزۋىنە جول اشادى. الەكسەيدىڭ ءوزى اپتاسىنا ءۇش رەت كلۋبقا كەلىپ، قاتىسۋشىلارمەن بىرگە اڭگىمەلەسەدى. «قازاقشا سويلەگەن، پىكىر الماسقان وزىمە قىزىقتى. باسى-قاسىندا بولۋ ءوزىم ءۇشىن دە ۇلكەن قۋانىش»، – دەيدى ول.
كلۋبتىڭ جۇمىسىنا KIMEP ۋنيۆەرسيتەتى عيمارات ۇسىنىپ، Kaz Minerals كومپانياسى دەمەۋشىلىك كورسەتىپ كەلەدى. ءقازىر «Batyl Bol» اپتاسىنا ءۇش رەت وفلاين ساباق وتكىزەدى. توپتار سانى كوبەيگەن. كۋرس تەك وفلاين فورماتتا، سەبەبى الەكسەي ءتىلدى تەك تابيعي تىلدىك ورتادا، تىكەلەي قارىم-قاتىناس ارقىلى ۇيرەنۋگە بولادى دەپ سانايدى.
بۇگىندە كلۋب الماتىدان بولەك استانا، اقتاۋ جانە ورال قالالارىندا دا ءوز فيليالدارىن اشقان.
«Batyl Bol» – ەركىندىك پەن ىنتانىڭ، ازاماتتىق جاۋاپكەرشىلىك پەن تىلگە دەگەن قۇرمەتتىڭ ناتيجەسىندە تۋعان جوبا. باستاما قازاق ءتىلىن ۇيرەنۋگە نيەتتى ءار ادام ءۇشىن ۇلكەن مۇمكىندىك بەرەتىن الاڭ.
كەزدەسۋ ناتيجەسىندە قوعامدىق دامۋ ورتالىعى بازاسىندا قازاق تىلىندە تەگىن سويلەۋ داعدىلارىن دامىتۋ ورتالىعىن اشۋ تۋرالى كەلىسىم جاسالدى.