«اتامەكەن» پالاتاسى استىق ەكسپورتىنا تىيىم سالۋ قاجەت دەپ ەسەپتەيدى.
رەسەي مەن باتىس ەلدەرى اراسىنداعى ساۋدا كيكىلجىڭى وتاندىق ەكونوميكاعا اسەرىن تيگىزىپ جاتىر، دەپ حابارلايدى اlmaty-akshamy.kz.
بۇگىندە كاسىپكەرلەر «اتامەكەن» پالاتاسىنا شاعىمىن كوبەيتكەن. ولاردىڭ بازىناسى ورىندى، ماسەلەنى شەشۋ جولدارى دا بار ەكەنىن ايتادى ۇلتتىق كاسىپكەرلەر پالاتاسى. "قازاقستاندا بيداي باعاسى ەكى اپتادا 40 پايىزعا ءوستى. الدىڭعى كەزەكتە ۇن وندىرۋشىلەر مەن قۇس فابريكالارىنىڭ كاسىبى تىعىرىققا تىرەلۋگە شاق تۇر. اۋىل شارۋاشىلىعى تاۋارىن وندىرۋشىلەر، ءسۇت-تاۋارلى فەرمالار دا استىق باعاسىنىڭ شارىقتاۋىنا الاڭداۋلى"، - دەيدى «اتامەكەن» پالاتاسىنىڭ وكىلدەرى.
- قۇس فابريكالارى قازىرگى كەزدە مىناداي ماسەلە كوتەرىپ وتىر، بيدايدىڭ باعاسى وسىدان 2 اپتا بۇرىن 120 تەڭگە بولسا، قازىرگى كەزدە 180 تەڭگەگە ءوسىپ كەتتى. بۇل پروبلەما ءبىزدىڭ كاسىپكەرلەردى قاتتى الاڭداتۋدا. رەسەي 15 ناۋرىزدان باستاپ قانت پەن استىق ەكسپورتىنا تىيىم سالدى. شەكتەۋ بىرنەشە ايعا جالعاسادى. مۇنداي كۇرت شەشىمنەن ەلىمىزدىڭ ناۋبايحاناشىلارى شيكىزات تاپشىلىعىنا تاپ بولدى. ەكسپورت ماسەلەسىن ۋاقىتشا جاباتىن بولساق، شەكتەيتىن بولساق، ىشكى نارىقتا باعا تۇسەدى. بۇگىندە قازاقستان ورتالىق ازيا ەلدەرىنە استىق جەتكىزىپ وتىر. ءبىراق ءدال قازىرگى جاعدايدا وعان كۆوتا ەنگىزۋ نەمەسە تۇبەگەيلى تىيىم سالۋ قاجەت، - دەيدى «اتامەكەن» ۇكپ باسقارما ءتوراعاسىنىڭ مىندەتىن اتقارۋشى ناريمان ءابىلشايىقوۆ.