بۇل شارا اسكەرلەردىڭ جابدىقتاۋ جۇمىسىنىڭ تيىمدىلىگىن ايتارلىقتاي ارتتىرادى.
قازاقستان اسكەريلەرى ارنايى ۇيىمداستىرىلعان «باتىل تويتارىس – 2022» اتتى وقۋ-جاتتىعۋعا قاتىسىپ جاتىر، دەپ حابارلايدى Almaty-akshamy.kz.
««باتىل تويتارىس – 2022» كەشەندى ۆەدومستۆوارالىق ستراتەگيالىق كوماندالىق-شتابتىق وقۋ-جاتتىعۋى شەڭبەرىندە بولىمشەلەر اسكەرلەردى ۇزدىكسىز جانە ۋاقتىلى قامتاماسىز ەتۋ تاپسىرمالارىن ورىندايدى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
وقۋ-جاتتىعۋدىڭ بارلىق كەزەڭىندە تىلدىق جانە تەحنيكالىق قامتاماسىز ەتۋ شارالارى وتكىزىلەدى. مارش بارىسىندا قاجەتتى تەحنيكالىق كومەك كورسەتىلىپ، ايالدامالاردا تەحنيكاعا جاعارماي قۇيۋ جۇزەگە اسادى.
بەلگىلەنگەن اۋداندارعا جەتكەن سوڭ دالالىق جاعدايدا جەكە قۇرامعا وق-دارىلەردى جەتكىزۋ، قارۋ-جاراق پەن اسكەري تەحنيكانى جاۋىنگەرلىك قولدانۋعا دايىنداۋ، تاماقتاندىرۋ جانە مونشا-كىر جۋۋ قىزمەتتەرىن كورسەتۋ ۇيىمداستىرىلدى.
وڭتۇستىك وڭىردە تاۋلىگىنە 5 توننا نان پىسىرەتىن مەحانيكالاندىرىلعان دالالىق نان زاۋىتى جۇمىسقا كىرىستى.
دالالىق ءوق-دارى قويمالارى، جانارماي قۇيۋ بەكەتتەرى اشىلىپ، زاقىمدالعان ماشينالاردى ەۆاكۋاسيالاۋ قۇرالدارى مەن جوندەيتىن شەبەرحانالارى بار قوسىمشا پۋنكتتەر قۇرىلدى.
اسكەري قىزمەتشىلەرگە مەديسينالىق كومەك كورسەتۋگە قاجەتتى ەلەمەنتتەرى بار دالالىق گوسپيتالدەر مەن لازارەتتەرگە ورنالاستىرىلدى.
تىلدىق جانە تەحنيكالىق قامتاماسىز ەتۋ – قىزمەتتىڭ ماڭىزدى باعىتتارىنىڭ ءبىرى ەكەنىن الەمدىك تاجىريبە كورسەتىپ وتىر. ونسىز جاۋىنگەرلىك ءىس-قيمىلداردا تابىسقا جەتۋ مۇمكىن ەمەس. ۆەدومستۆوارالىق وقۋ-جاتتىعۋ شەڭبەرىندە ۇلتتىق ۇلاننىڭ، شەكارا قىزمەتىنىڭ قولباسشىلىعىمەن، توتەنشە جاعدايلار مينيسترلىگىنىڭ باسشىلىعىمەن، ورتالىق مەملەكەتتىك جانە جەرگىلىكتى اتقارۋشى ورگاندارمەن تىعىز ءوزارا ءىس-قيمىل ۇيىمداستىرىلدى. بۇل اسكەرلەردىڭ جابدىقتاۋ جۇمىسىنىڭ تيىمدىلىگىن ايتارلىقتاي ارتتىرادى.
«باتىل تويتارىس – 2022» كەشەندى ۆەدومستۆوارالىق ستراتەگيالىق كوماندالىق-شتابتىق وقۋ-جاتتىعۋ مەملەكەت باسشىسى قاسىم-جومارت توقايەۆتىڭ كۇشتىك قۇرىلىمدار اراسىنداعى ءتيىمدى ۇيلەستىرۋدى قامتاماسىز ەتۋ، ولاردىڭ جەدەل جانە اسكەري-تەحنيكالىق ۇيلەسىمدىلىگىن جولعا قويۋ، سونداي-اق ۆەدومستۆوارالىق ۇيلەستىرۋدى كۇشەيتۋ جونىندەگى تاپسىرمالارىن ىسكە اسىرۋ اياسىندا وتكىزىلەتىنىن ەستەرىڭىزگە سالا كەتەيىك.
