9 ايدا ەلىمىزدە 299 711 بالا ومىرگە كەلدى.
بيىلعى 9 ايدا قازاقستاندا 300 مىڭعا جۋىق ءسابي دۇنيەگە كەلدى. ءبىراق، ستاتيستيكا كورسەتكەندەي، ءولىم كورسەتكىشى دە ازايماي تۇر، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۇلتتىق ستاتيستيكا بيۋروسىنىڭ دەرەگىنە سايكەس، بيىلعى 9 ايدا ەلىمىزدە 299 711 بالا ومىرگە كەلدى. بۇل 2021 جىلمەن سالىستىرعاندا 39 059 بالاعا از. ياعني، وتكەن جىلى 9 ايدا 338 770 ءسابي دۇنيە ەسىگىن اشقان. ولىم-جىتىمگە كەلسەك، بيىل 9 ايدا ول 8،18%-دى قۇرادى. وتكەن جىلدىڭ 9 ايىندا نارەستە ءولىمى 7،92% بولعان. بيىل 2021 جىلمەن سالىستىرعاندا ازداعان ءوسىم بار»، - دەگەن جاۋاپ بەردى دەنساۋلىق ساقتاۋ مينيسترلىگى قازاقپارات ساۋالىنا.
سونداي-اق، اتالعان ۆەدومستۆو بالالار اراسىندا قانداي اۋرۋلاردىڭ ءجيى كەزدەسەتىنى جايلى مالىمەت ۇسىندى.
«جەدەل دەرەككە سەنسەك، بالالار اراسىندا تىنىس الۋ اعزالارى اۋرۋلارى، قان جانە قان ءتۇزۋ، اس قورىتۋ جۇيەلەرى، جاراقاتتار، ۋلانۋ مەن سىرتقى سەبەپتەر اسەرى سالدارىنان پايدا بولاتىن اۋرۋ تۇرلەرى ءجيى كەزدەسەدى»، - دەلىنگەن حابارلامادا.
ودان بولەك، مينيسترلىك بالا دەنساۋلىعىنا دارىگەرلەردىڭ قاتەلىگىنەن زيان كەلگەن جاعدايدا قايدا جۇگىنۋ كەرەكتىگىن ايتتى.
«بالانىڭ دەنساۋلىعىنا مەديسينا قىزمەتكەرىنىڭ تاراپىنان زالال كەلتىرىلگەن جاعدايدا، ونىڭ اتا-اناسى نەمەسە زاڭدى وكىلى مينيسترلىكتىڭ مەديسينالىق جانە فارماسيەۆتيكالىق باقىلاۋ كوميتەتىنە جۇگىنە الادى. قازاقستان رەسپۋبليكاسىنىڭ 2015 جىلعى 29 قازانداعى كاسىپكەرلىك كودەكسىنىڭ 3-بابىنىڭ 3-تارماقشاسىنا سايكەس، قۇقىعى بۇزىلعان جەكە جانە زاڭدى تۇلعالاردىڭ ءوتىنىشىن جانە مەملەكەتتىك ورگانداردىڭ وتىنىشتەرىن قوسپاعاندا، ادام ومىرىنە، دەنساۋلىعىنا، قورشاعان ورتاعا جانە جەكە، زاڭدى تۇلعالاردىڭ، مەملەكەتتىڭ زاڭدى مۇددەلەرىنە زيان كەلتىرىلگەنى تۋرالى ناقتى فاكتىلەر بويىنشا جەكە جانە زاڭدى تۇلعالاردىڭ وتىنىشتەرى تىركەلگەن جاعدايدا جوسپاردان تىس تەكسەرۋ جۇرگىزىلەدى»، - دەيدى ۆەدومستۆو.