قازاقستاندا 16 ماۋسىمنان باستاپ ايەلدەر قۇقىقتارى مەن بالالاردىڭ قاۋىپسىزدىگىن قامتاماسىز ەتۋ تۋرالى زاڭ كۇشىنە ەنەدى، مۇندا بالا قۇقىقتارى جونىندەگى وڭىرلىك ۋاكىلدەردىڭ مارتەبەسىن زاڭنامالىق تۇرعىدان بەكىتۋ كوزدەلگەن.
بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى ايتىپ بەردى، دەپ حابارلايدى Almaty-akshamy.kz.
2022 جىلدان باستاپ ەلىمىزدىڭ 20 وڭىرىندە وڭىرلىك ۋاكىلدەر جۇمىس اتقارىپ كەلەدى.
يۋليا وۆەچكينانىڭ ايتۋىنشا، وڭىرلىك ۋاكىلدەر ق ر بالا قۇقىقتارى جونىندەگى ۋاكىلىمەن تىعىز بايلانىستا جۇمىس ىستەيدى.
«وڭىرلىك ۋاكىلدەر ۆەدومستۆوارالىق بايلانىستى ۇيلەستىرەدى، بالالاردىڭ قۇقىقتارى بۇزىلعان ءاربىر جاعدايدى جەكە باقىلاۋىندا ۇستايدى جانە ءوز وڭىرىندەگى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيالاردىڭ قۇرامىنا كىرەدى. بالا قۇقىقتارى جونىندەگى وڭىرلىك ۋاكىلدەر ينستيتۋتىن ەنگىزۋ بالالاردىڭ قۇقىقتارىن قورعاۋ جۇيەسىن نىعايتۋداعى ماڭىزدى قادام بولىپ تابىلادى. بۇل بالالاردىڭ قۇقىقتارىنىڭ بۇزىلۋىنا بارىنشا ءتيىمدى دەن قويۋعا جانە ولاردىڭ الدىن الۋعا مۇمكىندىك بەرەدى»، - دەپ اتاپ ءوتتى يۋليا وۆەچكينا.
بالا قۇقىقتارى جونىندەگى ۋاكىلدىڭ قۇزىرەتىنە «111» بايلانىس ورتالىعىنىڭ قىزمەتىن ۇيلەستىرۋ، سونداي-اق مەملەكەتتىك جانە قوعامدىق ينستيتۋتتارمەن ءوزارا ءىس-قيمىلىن ۇيىمداستىرۋ كىرەدى.