الماتى. AQSHAMNEWS. KZ الماتى قالاسىنىڭ پوليسياسى ەسىرتكىگە قارسى ايلىقتى باستادى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى پد ەسىرتكى قىلمىسىنا قارسى ءىس قيمىل باسقارماسىنىڭ اسا ماڭىزدى ىستەر جونىندەگى اعا جەدەل ۋاكىلى داۋرەن كوبەيەۆ مالىمدەدى.
ونىڭ ايتۋىنشا، 2024 جىلدىڭ 5 ايىندا الماتى اۋماعىندا پوليسيا ەسىرتكى قۇرالدارىنىڭ زاڭسىز اينالىمىنا بايلانىستى 264 قۇقىق بۇزۋشىلىقتى انىقتاعان. ەسىرتكى ساتۋدىڭ 116 فاكتىسىنىڭ جولى كەسىلدى. 158 كيلوگرامنان استام ەسىرتكى زاتتارى تاركىلەندى جانە زاڭسىز اينالىمعا جىبەرىلمەدى.
«بۇگىنگى تاڭدا جاھاندىق پروبلەمالاردىڭ ءبىرى سينتەتيكالىق پرەپاراتتار مەن ولاردى وندىرۋگە ارنالعان زەرتحانالار بولىپ وتىر. الماتى پوليسياسى جۇرگىزگەن جەدەل جانە ارنايى ءىس - شارالاردىڭ ناتيجەسىندە 5 ەسىرتكى لابوراتورياسى جويىلدى»، - دەدى داۋرەن كوبەيەۆ.
سونىمەن قاتار، ەلەكتروندى تولەمدەردى قولدانا وتىرىپ، ينتەرنەت ارقىلى بايلانىسسىز ءادىس ارقىلى سينتەتيكالىق ەسىرتكىنى تاراتۋ ءۇردىسى وزەكتى ماسەلەلەردىڭ ءبىرى بولىپ قالا بەرەدى. جىل باسىنان بەرى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى 41 ەسىرتكى قويىپ كەتۋشىنى ۇستادى.
ەسىرتكىنى تاراتاتىن جانە جارنامالايتىن 337 ينتەرنەت-رەسۋرس انىقتالدى جانە بۇعاتتالدى.
جالپى جەدەل-ىزدەستىرۋ ىس-شارالارىمەن قاتار، الماتى پوليسياسى ناشاقورلىقتىڭ الدىن الۋ جانە ەسىرتكىگە قارسى قوعامدىق يممۋنيتەتتى قالىپتاستىرۋ بويىنشا جۇمىس جۇرگىزۋدە.
جىل باسىنان بەرى مەگاپوليستە ءتارتىپ ساقشىلارى ەسىرتكىگە قارسى 242 پروفيلاكتيكالىق ءىس-شارا وتكىزدى.
«ناركوستوپ» قوزعالىسىنىڭ ەرىكتىلەرىمەن بىرلەسىپ، ەسىرتكىنىڭ تارالۋى تۋرالى اقپاراتتى قامتيتىن 3 مىڭ 651 گراففيتي سۋرەتى تابىلىپ، ءۇستىن بوياپ تاستاۋ ارقىلى جويىلدى.
ول الماتى پوليسياسى ناشاقورلىققا جانە ەسىرتكىنىڭ زاڭسىز اينالىمىنا قارسى حالىقارالىق كۇرەس كۇنى اياسىندا ەسىرتكىگە قارسى ايلىقتى باستاعانىن اتاپ ءوتتى.
پوليسەيلەر مەن ناركولوگ-دارىگەرلەر الدىن الۋ شارالارىنىڭ تيىمدىلىگىن ارتتىرۋ ماقساتىندا تەمەكى ونىمدەرىن، الكوگولدىك ىشىمدىكتەردى تۇتىنۋدىڭ زياندىلىعى جانە ولاردىڭ سالدارى تۋرالى دارىستەر، سەمينارلار، ترەنينگتەر سيكلىن وتكىزەدى.اتالعان ايلىقتىڭ ۇرانىمەن الماتى پوليسياسى 10 جاستان اسقان اۋديتورياعا ارنالعان الەۋمەتتىك روليكتى تانىستىرادى. ول ايتىلۋى ءتيىس نەگىزگى ويدىڭ جاسوسپىرىمدەرگە قول جەتىمدى بولۋى ءۇشىن تانىمال «Minecraft» بالالار ويىنىنىڭ فورماتىندا جاسالعان.
مەملەكەت باسشىسى مەن ۇكىمەت ەسىرتكىگە قارسى ناقتى جانە دايەكتى ستراتەگيا جۇرگىزۋدە، ونىڭ شەڭبەرىندە ناشاقورلىقتىڭ الدىن الۋعا، ەسكەرتۋ جاساۋعا جانە جولىن كەسۋگە باعىتتالعان ءبىرقاتار جوبالار ىسكە قوسىلدى.
«ءبىزدىڭ ورتاق ماقساتىمىز - ەسىرتكىسىز بولاشاقتى قۇرۋ. بۇگىندە ءبىز ەسىرتكىگە قارسى كۇرەستى مەملەكەتتىك ورگاندار عانا ەمەس، تاقىرىپتىق ءىس – شارالارعا قوعامدىق قوزعالىستار مەن ازاماتتىق قوعامداستىقتىڭ قاتىسۋى مەن ءقولداۋى-بىزدىڭ بىرلەسكەن كۇرەسىمىز دە بار ەكەنىن كورىپ وتىرمىز. ورتاق كۇش – جىگەرمەن ءبىز جاستارىمىزدى ولىمگە اكەلەتىن تاۋەلدىلىكتەن ساقتاندىرىپ، قورعاي الاتىنىمىزعا سەنىمدىمىن»، - دەپ قورىتىندىلادى داۋرەن كوبەيەۆ.