قازاقستاندا ازىق-تۇلىك تاۋارلارى مەن شيكىزات قورى جەتكىلىكتى

1،5 ملن توننا ءامات جانە 6،7 ملن توننا ازىق-تۇلىك بيدايىنىڭ قورى بار.

قازاقستان رەسپۋبليكاسى اۋىل شارۋاشىلىعى مينيسترلىگى ازاماتتاردى الەۋمەتتىك ماڭىزى بار ازىق-تۇلىك تاۋارلارىمەن قامتاماسىز ەتۋ جۇمىسى تۋرالى جانە ونىڭ تۇراقتى تۇردە جۇرگىزىلەتىنى تۋرالى حاباردار ەتتى، دەپ حابارلايدى Almaty-akshamy.kz.

«رەسپۋبليكا وتاندىق ءوندىرىس ەسەبىنەن نان، ۇن، ماكارون ونىمدەرى، وسىمدىك مايلارى، كارتوپ جانە كوكونىس ونىمدەرى، ەت، قاراقۇمىق جارماسى، كۇرىش، ءسۇت جانە ءسۇت ونىمدەرى جانە تاعى باسقا ازىق-تۇلىك تاۋارلارىنىڭ قاجەتتى كولەمىمەن تولىق قامتاماسىز ەتىلگەن»،- دەلىنگەن اشم باسپا ءسوز قىزمەتىنىڭ حابارلاماسىندا.

ازىق-تۇلىكتىڭ ەكونوميكالىق قولجەتىمدىلىگىن قامتاماسىز ەتۋ ءۇشىن وڭىرلەردىڭ تۇراقتاندىرۋ قورلارىندا ازىق-تۇلىك تاۋارلارىنىڭ قاجەتتى قورلارى قالىپتاستىرىلدى.

رەسپۋبليكانىڭ ازىق-تۇلىك قاۋىپسىزدىگى، سونداي-اق اۋىل شارۋاشىلىعى قۇرىلىمدارىنىڭ ۇزدىكسىز جۇمىسى ماسەلەلەرى تۇراقتى باقىلاۋدا.

اتاپ ايتقاندا، جەدەل دەرەكتەر بويىنشا رەسپۋبليكا بويىنشا اعىمداعى جىلدىڭ 4 ناۋرىزىنا 1،5 ملن توننا ءامات جانە 6،7 ملن توننا ازىق-تۇلىك بيدايىنىڭ  قورى بار.

ازىق-تۇلىك ونىمدەرىن ءوندىرۋ توقتاتىلمايدى، قورلار جۇيەلى نەگىزدە تولىقتىرىلىپ وتىرادى. جارما، ۇن، كونسەرۆىلەر جانە باسقا دا تاۋارلار ءوندىرىسى ءۇشىن جەتكىلىكتى شيكىزات، سونداي-اق ەت جانە ءسۇت ونىمدەرىن ءوندىرۋ ءۇشىن جەتكىلىكتى مال باسى بار.