قورعانىس مينيسترلىگىندە ايەلدەردى قۇتتىقتادى.
حالىقارالىق ايەلدەر كۇنىنە وراي قورعانىس مينيسترلىگىندە وسى سالاداعى قىز-كەلىنشەكتەرگە ارنالعان سالتاناتتى شارا ءوتتى، دەپ حابارلايدى Almaty-akshamy.kz.
«وتان قورعاۋشى دەگەن قاستەرلى ماماندىق ەرلەرگە عانا ءتان ەمەس. بۇگىندە اسكەردەگى قىز-كەلىنشەكتەر قارۋلى كۇشتەردىڭ جاۋىنگەرلىك ازىرلىگى مەن قورعانىس قابىلەتىن نىعايتۋعا لايىقتى ۇلەستەرىن قوسىپ كەلەدى. ولار وزدەرىنىڭ ەڭبەكسۇيگىشتىگىمەن جانە جاۋاپكەرشىلىگىمەن ەرەكشەلەنىپ ءجۇر»، – دەپ اتاپ ءوتتى سالتاناتتى شارانى اشقان قورعانىس ءمينيسترىنىڭ ءبىرىنشى ورىنباسارى مارات قۇسايىنوۆ.
باس شتاب باستىعى اسكەري قىزمەتشىلەردىڭ انالارى مەن جۇبايلارىنا وتان قورعاۋشىلاردىڭ كۇندەلىكتى قىزمەتىنە كورسەتكەن قولداۋى ءۇشىن العىسىن جەتكىزدى.
سونىمەن بىرگە، گەنەرال-لەيتەنانت مارات قۇسايىنوۆ قارۋلى كۇشتەردە بەلسەندى قوعامدىق قىزمەت اتقاراتىن ءبىرقاتار اسكەري قىزمەتشىلەردىڭ ايەلدەرىنە «وتان قورعاۋشىسىنىڭ اياۋلى جارى» توسبەلگىلەرىن تابىس ەتتى.
بۇگىندە قازاق اسكەرىندە ون ەكى مىڭنان استام ايەل قىزمەت ەتەدى. ولاردىڭ سەگىز جۇزگە جۋىعى – وفيسەر. ونىڭ ىشىندە جيىرما پولكوۆنيك، بەس مىڭعا جۋىق ازاماتتىق قىزمەتكەر بار. بىرىككەن ۇلتتار ۇيىمىنىڭ باتىس ساحارا مەن ليۆانداعى ميسسيالارىنا شتاب وفيسەرلەرى مەن اسكەري باقىلاۋشىلارى رەتىندە ءتورت ايەل قاتىستى.
قازىرگى ۋاقىتتا نازىك جاندىلار بارلىق اسكەر تۇرلەرى مەن تەكتەرىندە قىزمەت ەتەدى. ولار مەرگەن، بارلاۋشى، دەسانتشى، اسكەري ۇشقىش سياقتى ەر-ازاماتقا ءتان ماماندىقتى مەڭگەرىپ، بىتىمگەرشىلىك ميسسيالاردى ابىرويمەن اتقارىپ ءجۇر.
