سونداي-اق ونىڭ ايتۋىنشا، ق ر پرەزيدەنتى جانىنداعى مەملەكەتتىك باسقارۋ اكادەمياسى مەن «امانات» پارتياسى مينيسترلىكتىڭ قولداۋىمەن اۋداندىق ماڭىزى بار قالالار، اۋىلدار، كەنتتەر مەن اۋىلدىق وكرۋگتەر اكىمدەرىن قايتا دايارلاۋ باعدارلاماسىن ازىرلەدى.
جوبانىڭ نەگىزگى ماقساتتارى – جەرگىلىكتى ءوزىن-وزى باسقارۋ ماسەلەلەرىن ءتيىمدى شەشۋ جانە اكىمدەردىڭ كاسىبي جانە باسقارۋشىلىق قۇزىرەتتەرىن ارتتىرۋ ەسەبىنەن تۇراقتى الەۋمەتتىك-ەكونوميكالىق دامۋدى قامتاماسىز ەتۋ.
وقىتۋ قورىتىندىسى بويىنشا قاتىسۋشى اۋىلدىق وكرۋگتەردىڭ ەكونوميكالىق دامۋ باعدارلامالارىن ازىرلەيدى. قازىرگى ۋاقىتتا باعدارلاما اياسىندا ەلىمىزدىڭ 17 وڭىرىنەن 1 815 اۋىل اكىمى ءبىلىم الۋدا. بۇدان بولەك، اۋىلدىق وكرۋگ اكىمدەرىنىڭ وكىلەتتىكتەرىن كەڭەيتۋ ماقساتىندا مىناداي شارالار ۇسىنىلادى:
- اكىمدەرگە ازاماتتىق قىزمەتشىلەرگە ەڭبەكاقى تولەۋدىڭ بەلگىلەنگەن جۇيەسى بويىنشا ەڭبەك شارتى شەڭبەرىندە جۇمىسكەرلەردى جالداۋ قۇقىعىن بەرۋ؛
- حالىققا اقىلى قىزمەت كورسەتۋ قۇقىعىمەن ارنايى تەحنيكا مەن اۋىل شارۋاشىلىعى تەحنيكاسىن ساتىپ الۋعا رۇقسات بەرۋ؛
- اكىمدەر مەن ولاردىڭ اپپاراتتارىنىڭ كوشە ساۋداسىن مونيتورينگىلەۋ، قوعامدىق ورىنداردى اباتتاندىرۋ، بالالار ويىن الاڭدارىن پايدالانۋدى باقىلاۋ، اقىلى قىزمەتتەر كورسەتۋ جانە باسقا دا ماسەلەلەر بويىنشا وكىلەتتىكتەرىن كەڭەيتۋ.
«بۇل يننوۆاسيالار پارلامەنت ءماجىلىسىنىڭ دەپۋتاتتارىمەن قوسىمشا پىسىقتالاتىن بولادى»، – دەپ تولىقتىردى سپيكەر.
باۋىرجان وماربەكوۆ اتاپ وتكەندەي، تاعى ءبىر وزەكتى ماسەلە – اۋىل بيۋدجەتىنىڭ كىرىس كوزدەرىن كەڭەيتۋ. قازىرگى ۋاقىتتا بيۋدجەتتىڭ 4 دەڭگەيىندەگى كىرىستەر سالىق تۇسىمدەرىنىڭ 8 ءتۇرى جانە اۋداندىق بيۋدجەتتەن تۇسەتىن ءتۇرلى ءتۇسىم، ايىپپۇلدار مەن ترانسفەرتتەر ەسەبىنەن قالىپتاستىرىلادى.
4 دەڭگەيدەگى كىرىستەر ەنگىزىلگەن ساتتەن باستاپ كىرىستەر ەكى ەسەگە ءوستى. ماسەلەن، 2023 جىلدىڭ قورىتىندىسى بويىنشا 4 دەڭگەيدەگى بيۋدجەتتىڭ جوسپارلى تۇسىمدەرى 308 ملرد تەڭگەنى قۇرادى، ال ءىس جۇزىندە 320 ملرد تەڭگە ءتۇستى، بۇل جوسپاردان 103،8%-عا جوعارى. بۇل رەتتە ۆيسە-مينيستر اۋىلدىق بيۋدجەتتەردىڭ قارجىلىق دەربەستىگىن ارتتىرۋ قاجەتتىگىن اتاپ ءوتتى. وسىعان بايلانىستى كەلەسى تۇسىمدەردى بەرۋ ەسەبىنەن اۋىلدىق وكرۋگتەر بيۋدجەتىنىڭ كىرىس كوزدەرىن كەڭەيتۋ ۇسىنىلادى:
- زاڭدى تۇلعالار مەن جەكە كاسىپكەرلەردىڭ مۇلىك سالىعىنىڭ بولىكتەرى؛
- سۋ رەسۋرستارىن پايدالانعانى ءۇشىن تولەمدەر؛
- بەلگىلى ءبىر قىزمەت تۇرلەرىمەن اينالىسۋ قۇقىعى ءۇشىن ليسەنزيالىق الىم؛
- بەلگىلى ءبىر قىزمەت تۇرلەرىنە ليسەنزيالاردى پايدالانعانى ءۇشىن تولەمدەر.
بۇدان بولەك، بيۋدجەت كودەكسىنىڭ جاڭا جوباسى شەڭبەرىندە 4 دەڭگەيدەگى بيۋدجەتكە كەڭ تارالعان پايدالى قازبالاردى وندىرۋگە سالىناتىن سالىقتى بەرۋ جوسپارلانۋدا. وسىلايشا، 4 دەڭگەيدەگى بيۋدجەتتىڭ ءوز كىرىستەرىن 4 ەسەگە – 68 ملرد تەڭگەدەن 263 ملرد تەڭگەگە دەيىن ۇلعايتۋ كۇتىلۋدە. اۋىلدىق بيۋدجەتتەردىڭ كىرىس كوزدەرىن كەڭەيتۋ جونىندەگى جۇمىس جالعاسادى.