2025 جىلدىڭ باسىنان وتباسى ماسەلەلەرى، ايەلدەر مەن بالالاردىڭ قۇقىقتارىن قورعاۋ بويىنشا مەملەكەتتىك «111» ءبىرىڭعاي بايلانىس ورتالىعىنا 40 مىڭنان استام ءوتىنىش كەلىپ ءتۇستى.
ونىڭ ىشىندە 339 ءوتىنىش تەلەفون ارقىلى قابىلدانسا، قالعانى ءبىلىم بەرۋ ۇيىمدارىندا ورنالاستىرىلعان QR-كودتار ارقىلى جولدانعان، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
وتىنىشتەردىڭ باسىم بولىگى اقپاراتتىق سيپاتتا بولدى – بالالارعا انىقتامالىق مالىمەتتەر، كەڭەستەر بەرىلىپ، سونداي-اق پسيحولوگيالىق قولداۋ كورسەتىلدى. كۇردەلى جاعدايلاردا ءتيىستى ورگانداردىڭ قاتىسۋىمەن ۆەدومستۆوارالىق كومەك ۇيىمداستىرىلدى.
«111» بايلانىس ورتالىعى ءوتىنىش بىلدىرۋشىلەردىڭ جەكە دەرەكتەرىنىڭ قۇپيالىعىن جانە انونيمدىلىگىن تولىقتاي قامتاماسىز ەتەدى. قاجەتتىلىگىنە قاراي ول قۇقىق قورعاۋ، قورعانشىلىق ورگاندارىنا نەمەسە باسقا دا مۇددەلى مەملەكەتتىك مەكەمەلەرگە بەرىلەدى. ورتالىق پوليسيامەن، دەنساۋلىق ساقتاۋ جانە ءبىلىم بەرۋ ۇيىمدارىمەن، سونداي-اق ۇكىمەتتىك ەمەس ۇيىمدارمەن تىعىز بايلانىستا جۇمىس ىستەپ، بالالاردىڭ قۇقىقتارى مەن مۇددەلەرىن قورعاۋعا باعىتتالعان شۇعىل شارالار قابىلدايدى.
«بۇل بايلانىس ورتالىعى بالالارعا وزدەرىنىڭ ويلارىن، كوڭىل-كۇيلەرى مەن ماسەلەلەرىن قىمسىنباي، قورىقپاي جەتكىزۋگە مۇمكىندىك بەرەدى. مۇنداي باستاما بالالار ءۇشىن قولايلى ورتا قالىپتاستىرۋعا، اشىق ديالوگ مادەنيەتىن دامىتۋعا جانە قوعامنىڭ پسيحولوگيالىق ءال-اۋقاتىن جاقسارتۋعا ىقپال ەتەدى»، – دەيدى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
ايتا كەتەيىك، 2024 جىلعى شىلدە ايىندا قابىلدانعان «ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ تۋرالى» زاڭ اياسىندا «111» بايلانىس ورتالىعىنىڭ قىزمەتى زاڭنامالىق تۇردە بەكىتىلدى. ال 2025 جىلدىڭ قاڭتار ايىنان باستاپ مەكتەپتەر مەن كوللەدجدەردە ورتالىققا جەدەل قول جەتكىزۋگە مۇمكىندىك بەرەتىن QR-كودتار ورنالاستىرىلدى. بۇل باستاما ق ر بالا قۇقىقتارى جونىندەگى ۋاكىلمەن بىرلەسىپ جۇزەگە اسىرىلدى.