قازاقستاندا «اتا جولى» كارتاسى ەنگىزىلەدى

قازاقستاندا ءوز كاسىبىن جۇرگىزۋگە مۇمكىندىك الادى. 

قانداستارىمىزعا 10 جىلدىق جەڭىلدەتىلگەن ۆيزا راسىمدەپ، قازاقستاندا ءوز كاسىبىن جۇرگىزۋگە مۇمكىندىك بەرىلەدى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ۇكىمەت وتىرىسى بارىسىندا ايتتى،  دەپ حابارلايدى Almaty-akshamy.kz قازاقپاراتقا سىلتەمە جاساپ.

تامارا دۇيسەنوۆانىڭ اتاپ وتۋىنشە، «اشىق قازاقستان 500+» اتتى كوشى-قون ساياساتىنىڭ جاڭا تۇجىرىمداماسىنىڭ ءتورتىنشى باعىتى ەتنيكالىق كوشى-قوندى رەتتەيدى. 

«بۇل باعىتتا نەگىزگى ەكى ماسەلە بار. ءبىرىنشىسى – شەتەلدە تۇراتىن ەتنيكالىق قازاقتاردىڭ الەۋەتىن پايدالانۋ. وسى ماقساتتا «اتا جولى» كارتاسىن ەنگىزۋ ۇسىنىلادى. بۇل قۇجات جوعارى دەڭگەيدەگى كاسىبي مامان نەمەسە وزدەرى تۇراتىن ەلدەردە تابىستى بيزنەس-كەيستەردى ىسكە اسىرعان جانە ولاردى قازاقستاندا جۇزەگە اسىرۋعا ىقىلاستى قازاقتارعا بەرىلەتىن بولادى»، - دەدى ول.

ونىڭ اتاپ وتۋىنشە، مۇنداي ازاماتتار 10 جىلدىق جەڭىلدەتىلگەن ۆيزا راسىمدەپ، قازاقستاندا ءوز كاسىبىن جۇرگىزۋگە مۇمكىندىك الادى.

«ولاردى تاريحي وتانىن دامىتۋعا قوسقان ۇلەسى ءۇشىن جىل سايىنعى «پارىز» بايقاۋى اياسىندا پرەزيدەنت سىيلىعىمەن ماراپاتتاۋدى ۇسىنىپ وتىرمىز. ەكىنشى – ەلگە كەلەتىن قانداستاردىڭ كوشى-قونىن رەتتەۋ تەتىكتەرىن جەتىلدىرۋ. ياعني، ەلىمىزدەگى دەموگرافيالىق جانە ەكونوميكالىق ۇردىستەردى ەسكەرە وتىرىپ، قۇجاتتاردى راسىمدەۋدىڭ العاشقى كەزەڭىندە قانداستاردى ەڭبەك كۇشى تاپشى وڭىرلەرگە قونىستانۋعا قوسىمشا ىنتالاندىرۋ ۇسىنىلادى»، - دەدى تامارا دۇيسەنوۆا.