31 قازان - اسكەري بايلانىسشى كۇنى، دەپ حابارلايدى Almaty-akshamy.kz.
ەلىمىزدىڭ قارۋلى كۇشتەرىندەگى اتاۋلى كۇندەر مەن مەرەكەلەردىڭ ىشىندە اسكەري بايلانىسشىلار كۇنىنىڭ ورنى ەرەكشە.
بايلانىس اسكەرلەرى جاۋىنگەرلىك دايىندىقتى ۇيىمداستىرۋدى جانە قارۋلى كۇشتەردىڭ كۇندەلىكتى قىزمەتىن قامتاماسىز ەتەدى.
بايلانىس اسكەرلەرىنىڭ تەحنيكالىق جاعىنان جابدىقتالۋى ۇنەمى ارتىپ كەلەدى. اۆتوماتتاندىرۋ، بايلانىس قۇرالدارىنىڭ سوڭعى جۇيەلەرى جانە وزىق تەحنولوگيالىق ازىرلەمەلەر كەز كەلگەن جاعدايدا بايلانىستى قامتاماسىز ەتۋدەگى ەڭ كۇردەلى تاپسىرمالاردى ءتيىمدى شەشۋگە مۇمكىندىك بەرەدى.
قازىرگى زامانعى تەحنيكالار ساۋاتتى باسقارۋدى، ياعني مۇقيات تەحنيكالىق دايىندىق پەن اۆتوماتيزمگە ۇلاسقان داعدىلاردى قاجەت ەتەدى. اسكەري ورتادا "بايلانىسسىز باسقارۋ مۇمكىن ەمەس" دەپ ايتىلۋى زاڭدىلىققا اينالعان.
شتابتار مەن بولىمشەلەر اراسىنداعى اقپارات الماسۋدىڭ جىلدامدىعى مەن ساپاسى، قۇرلىقتاعى، اۆياسيالىق جانە تەڭىز بولىمشەلەرى ءىس-قيمىلدارىنىڭ ۇيلەسىمدىلىگى، سونداي-اق جاۋىنگەرلىك قۇرالدار مەن قارۋدى ءتيىمدى قولدانۋ تۇراقتى بايلانىسقا قاتىستى.
اسكەري بايلانىسشىلار وزدەرىنىڭ جوعارى كاسىبيلىگى مەن شەبەرلىگىن "باتىل تويتارىس-2023"، "ايبالتا-2023" ستراتەگيالىق وقۋ-جاتتىعۋلارى مەن باسقا دا ءىس-شارالار بارىسىندا بىرنەشە رەت دالەلدەگەن.
قازاقستاندا بايلانىس وفيسەرلەرىن الماتىداعى راديوەلەكترونيكا جانە بايلانىس اسكەري-ينجەنەرلىك ينستيتۋتىندا دايىندايدى. ورتا بۋىن ماماندارى ساعادات نۇرماعامبەتوۆ اتىنداعى استانالىق اسكەري كوللەدجدە ءبىلىم الىپ شىعادى. كىشى دەڭگەيدەگى اسكەري-ەسەپتىك ماماندىقتاردىڭ نەگىزىن مەرزىمدى قىزمەت ساربازدارى الماتى وبلىسىنداعى بايلانىس اسكەرلەرىنىڭ وقۋ ورتالىعىندا يگەرەدى.
اسكەري عىلىمدى دامىتۋدىڭ ماڭىزدى قادامى ۇلتتىق قورعانىس ۋنيۆەرسيتەتىنىڭ بازاسىندا بايلانىس جانە اقپاراتتىق قاۋىپسىزدىك كافەدراسىن قۇرۋ بولدى. بۇل جەردە كەلەشەكتە بايلانىس سالاسىنداعى ماگيسترانتتار مەن دوكتورانتتار دايارلاناتىن بولادى. اسكەري بايلانىس جوعارى بىلىكتى، ءوز ءىسى مەن تۋعان وتانىنا بەرىلگەن بايلانىس اسكەرلەرىنىڭ ماماندارىنان تۇرادى. سول سەبەپتى ولارعا اسكەردىڭ جاۋىنگەرلىك دايىندىق جۇيەسىندە زور جاۋاپكەرشىلىك جۇكتەلگەن.