البانيا استاناسى تيراندا 23 جاسقا دەيىنگى جاستار اراسىندا وتكەن كۇرەستەن الەم چەمپيوناتى اياقتالدى.
67 كەلىگە دەيىنگى سالماقتا ەل نامىسىن قورعاعان ارميا سپورتشىسى سۇلتان اسەت ۇلى قارسىلاستارىنا دەس بەرمەي، التىننان القا تاعىندى، دەپ حابارلايدى Almaty-akshamy.kz.
ق ر قورعانىس مينيسترلىگى سايتىنىڭ اقپاراتىنا ساي، اقتىق سىندا ول تۇرىك سپورتشىسى مۇستافا يىلدىرىمدى 2:1 ەسەبىمەن ۇتقان.
«گرەك-ريم كۇرەسىنەن ءبىزدىڭ سپورتشىلار الەم چەمپيوناتىندا جاقسى ناتيجە كورسەتتى. ماقساتىمىز دا وسى تۋرنيردە جەڭىسكە جەتۋ بولاتىن. وعان قول جەتكىزدىك. سۇلتان سپورتشىعا ءتان مىنەز بەن مىقتىلىعى بار كاسىپقوي ەكەنىن دالەلدەدى»، – دەدى بالۋاننىڭ جاتتىقتىرۋشىسى مارات قۋاتوۆ.
قازاقستان كومانداسىنىڭ قورجىنىنا كۇمىس جۇلدەنى 55 كەلىگە دەيىنگى سالماقتا يسحار قۇربايەۆ سالدى. سوڭعى كەزدەسۋدە ول گرۋزين بالۋانى گەورگيي توكحادزەگە ەسە جىبەردى.
ايتا كەتۋ كەرەك، سۇلتان اسەت ۇلى – 23 جاسقا دەيىنگى ساناتتاعىلار ىشىندە الەم چەمپيونى اتانعان العاشقى قازاقستاندىق بالۋان.