الماتىدا كۇزگى وتىرعىزۋ كوشەتتىڭ يممۋنيتەتىن جاقسارتادى – ساراپشى
كۇز باسىندا اعاش وتىرعىزۋ كوشەتتەردى سترەسسكە ۇشىراۋدان سەنىمدى قورعايدى، دەدى قازاقستاننىڭ كوگالداندىرۋشىلار قاۋىمداستىعى (اوك) كەڭەسىنىڭ حاتشىسى، Almaty Garden Show باس ديزاينەرى بيبىگۇل داتحابايەۆا. ساراپشى كۇزگى ۋاقىتتا اعاش وتىرعىزۋ ەڭ قولايلى كەزەڭ ەكەنىن ايتتى. قازىرگى كليماتتىق جاعدايدا كوگالداندىرۋشىلاردىڭ وسىمدىكتەردى وتىرعىزۋ ءۇشىن 2-3 اپتاسى عانا بار، دەپ حابارلايدى almaty-akshamy.kz
«قىستان كەيىن ىستىق جاز بىردەن باستالادى، وسىمدىكتەر بىردەن ءوسىپ،، گۇلدەنە باستايدى. وسى ۋاقىتتا قايتا وتىرعىزۋ ۇلكەن سترەسس. ەگەر ءسىز بەلگىلەنگەن قىسقا مەرزىمدە اياقتاماساڭىز، وندا كوپ اعاشتىڭ وسپەي قالۋ ءقاۋپى بار، اسىرەسە بۇل قالادا كوشەتتەردى جاپپاي وتىرعىزۋ كەزىندە. كۇزدە سترەسس الدەقايدا از، بارلىق اگروتەحنيكالىق نورما مەن ەرەجە ساقتالعان جاعدايدا وسىمدىك ءقازىر جاقسى تامىرلانىپ، كوكتەمدە كوكتەيدى»، - دەدى بيبىگۇل داتحابايەۆا.
لاندشافت ديزاينەرى كوپتەگەن اعاش تۇرلەرى كۇزگى وتىرعىزۋعا جارامدى ەكەنىن اتاپ ءوتتى. كوگالداندىرۋشىلار الماتىنىڭ كليماتتىق جاعدايىنا ىڭعايلى كوشەتتەردى ەككەن.
«ءقازىر كوگالداندىرۋشىلار قاراعاش، ەمەن، ۇيەڭكى، شاعان، تەرەك، كاتالپا، قايىڭ، اكاسيا، شىرشا جانە جەمىس (الما، شيە، المۇرت، ورىك) وتىرعىزىپ جاتىر. بۇلار قالالىق جاعدايعا، قىستا ءتوزىمدى، كۇي تالعامايدى. ولار وڭتۇستىك استانانى كوگالداندىرۋدا بۇرىننان قولدانىلىپ كەلەدى، شاھاردىڭ تاريحي جاسىل جەلەگىن قالىپتاستىرعان. سوندىقتان، مەنىڭشە، جاڭا كوشەتتەر جاسىل قوردى تولىقتىرۋمەن قاتار، قالانىڭ قالىپتاسقان كوگالداندىرۋ ءستيلىن وزگەرتپەي، ۇيلەسىمدى ەتەدى»، - دەدى بيبىگۇل داتحابايەۆا.
ساراپشى كوگالداندىرۋ جۇمىستارى قالانىڭ ۇلكەيۋىنە قاراي جۇرگىزىلۋى كەرەك دەيدى. الماتى قارقىندى دامىپ كەلەدى، ب ا ق قالا مارتەبەسىن ساقتاۋ ءۇشىن جاسىل قوردى ساقتاپ، ۇنەمى تولىقتىرىپ وتىرۋ ماڭىزدى.
ايتا كەتەيىك، بيىل الماتىدا 320 مىڭ اعاش وتىرعىزۋ جوسپارلانعان، ونىڭ 20 مىڭى كوكتەمدە، 300 مىڭى كۇزدە ەگىلەدى.