اتالمىش ناۋقان وسى جىلدىڭ سوڭىنا دەيىن جالعاسادى.
قازاقستاننىڭ اسكەري قۇرىلىمدارىنىڭ قاتارى 18-27 جاس ارالىعىنداعى 17 مىڭ جاس ازاماتپەن تولىعادى. ءبىرىنشى قىركۇيەك كۇنى اسكەرگە شاقىرۋ ناۋقانى باستالدى، دەپ حابارلادى Almaty-akshamy.kz.
«جەرگىلىكتى اتقارۋشى ورگاندار، «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» ق ر زاڭىنا سايكەس، ازاماتتاردى مەرزىمدى اسكەري قىزمەتكە شاقىرۋدى ۇيىمداستىرىپ، قامتاماسىز ەتەدى. اسكەرگە الىنعان كۇننەن باستاپ 12 اي قىزمەت اتقارعان اسكەري قىزمەتشىلەردى زاپاسقا شىعارۋ دا جوسپارلى تارتىپپەن جۇرگىزىلەدى»، – دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، ەكىنشى جىل قاتارىنان اسكەرگە شاقىرۋ ناۋقانى پاندەميا جاعدايىندا وتۋدە. كوروناۆيرۋستى جۇقتىرۋ ءقاۋپىن ازايتۋ ءۇشىن اسكەرگە شاقىرىلۋشىلاردى حاباردار ەتۋ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ 1414 قىزمەتىمەن SMS-حابارلامالار جىبەرۋ ارقىلى جۇزەگە اسىرىلادى.
ۆيرۋستىق ينفەكسيادان قوسىمشا قورعانىس پتر-تەكسەرۋ بولىپ تابىلادى. اسكەرگە شاقىرىلۋشىلاردى ەكى رەت تەكسەرەدى. اسكەرگە شاقىرۋ كەزىندە جيناۋ پۋنكتتەرىندە جانە اسكەري بولىمدەرگە جاڭا تولىقتىرۋلار كەلگەننەن كەيىن.
«بارلىق سۇراقتار بويىنشا ازاماتتار ەلەكتروندىق پوشتا نەمەسە قورعانىس ىستەرى جونىندەگى دەپارتامەنتتەردىڭ الەۋمەتتىك جەلىلەردەگى رەسمي اككاۋنتتارى ارقىلى حابارلاسا الادى. سىبايلاس جەمقورلىق كورىنىستەرى تۋرالى حابارلامالار «قارۋلى كۇشتەر – ادالدىق الاڭى» جوبالىق كەڭسەلەرىندە جانە سەنىم تەلەفوندارى ارقىلى قابىلدانادى»، – دەپ ءتۇسىندىردى قارۋلى كۇشتەر باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى، پولكوۆنيك ساكەن ءجۇسىپوۆ.
اسەري مامانداردىڭ مالىمەتى بوىنشا، وڭىرلەردەگى اسكەرگە شاقىرۋ كوميسسيالارىن وبلىس، قالا جانە اۋدان اكىمدەرىنىڭ ورىنباسارلارى باسقارادى. ولار اسكەرگە شاقىرۋ كوميسسياسىنىڭ شەشىمىمەن نەمەسە مەديسينا ماماندارىنىڭ قورىتىندىلارىمەن كەلىسپەگەن ازاماتتاردىڭ وتىنىشتەرىن قارايدى.