جولداۋ جوعارى وقۋ ورىندارىنا زور مىندەت جۇكتەدى.
مەملەكەت باسشىسى قاسىم-جومارت توقايەۆتىڭ قازاقستان حالقىنا ارنالعان «جاڭا جاعدايداعى قازاقستان:ءىس-قيمىل كەزەڭى» جولداۋىن قازاق ينجەنەرلىك-تەحنولوگيالىق ۋنيۆەرسيتەتىنىڭ ۇجىمى ءبىلىم كۇنىنە ارنالعان سالتاناتتى جيىن بارىسىندا تىڭدادى، دەپ حابارلايدى Almaty-akshamy.kz ۋنيۆەرسيتەتتىڭ باسپا ءسوز قىزمەتىنە سىلتەمە جاساپ.
جولداۋدا جوعارى وقۋ ورىندارىنىڭ الدىنا، مامان دايىنداۋ سالالارى اياسىندا ايتىلعان جۇكتەۋلەرگە توقتالىپ وتكەن قازيتۋ رەكتورى گۇلنار سارسەنبەكوۆا جولداۋدىڭ ءبىلىم كۇنى قارساڭىندا ورىن الۋى جايدان-جاي ەمەستىگىن، قاي مەملەكەتتىڭ دە وركەنيەتتىلىگى ەڭ ءبىرىنشى بىلىممەن انىقتالاتىندىعىنىڭ ايعاعى ەكەندىگىن ايتتى. سونداي-اق ول 1 قىركۇيەك كۇنى پرەزيدەنت جۇكتەگەن ماقسات-مىندەتتەردىڭ ەڭ باستىسى – قاي سالادا بولسا دا ساپالى ماماننىڭ قاجەتتىلىگى ەكەندىگىن جەتكىزدى.
«پرەزيدەنتتىڭ «قازاقستاننىڭ الدىندا تۇرعان اسا ماڭىزدى مىندەت – ونەركاسىپتىك الەۋەتىمىزدى تولىق پايدالانۋ» دەگەن تالاپتاردىڭ ۇدەسىنەن شىعۋ ءۇشىن اۋىل شارۋاشىلىعى جانە ونەركاسىپ سالالارىندا مىقتى مامان-كادرلاردى دايىنداۋعا ەرەكشە سەرپىن بەرۋ - ۋنيۆەرسيتەتتەردىڭ باستى اتقارار مىندەتى دەپ تۇسىنەمىن»، - دەپ اتاپ ءوتتى گۇلنار سارسەنبەكوۆا.
قازاق ينجەنەرلىك-تەحنولوگيالىق ۋنيۆەرسيتەتىنىڭ باسشىسى پرەزيدەنتتىڭ «اۋىل شارۋاشىلىعىن دامىتپاي، باسەكەگە قابىلەتتى ەكونوميكا قۇرۋ مۇمكىن ەمەس» دەگەن تاپسىرماسى وسى سالادا تىكەلەي ماماندار دايارلاپ وتىرعان اتالمىش وقۋ وورنىنا ۇلكەن جاۋاپكەرشىلىك جۇكتەيتىنىن اتادى.
رەكتور جولداۋدا فينانس، اقپاراتتىق تەحنولوگيالار جانە اۋىل شارۋاشىلىق سالالارىنا مامانداردى دايىنداۋ ەرەكشەلىكتەرى مەن ارتىقشىلىقتارىنا ەرەكشە ءمان بەرىلگەندىگىنە توقتالدى. سونداي-اق ءبىلىم ورداسىنىڭ باسشىسى وسى سالادا مامانداردى دايىنداۋدا وقۋ باعدارلامالارىنىڭ مازمۇنىن ۇنەمى ارتتىرۋ ۋنيۆەرسيتەت دامۋ باعدارلاماسىنىڭ نەگىزگى باعىتى ەكەندىگىن ايتىپ، اتالعان ماماندىقتارعا وقۋعا تۇسكەن ستۋدەنتتەرگە ساتتىلىك تىلەدى.
سالتاناتتى جيىنعا وقىتۋشى-پروفەسسورلار قۇرامى، عالىمدار، ستۋدەنتتەر جانە اتا-انالار قاتىستى.