ۇيىمداردا كورسەتىلەتىن ارناۋلى الەۋمەتتىك قىزمەتتەردىڭ ساپاسىن ارتتىرۋ ماقساتىندا 2025 جىلعى 1 قاڭتاردان باستاپ قازاقستاندا ءااق كورسەتەتىن مامانداردىڭ ءتىزىلىمى ەنگىزىلدى.
ءتىزىلىم – بۇل الەۋمەتتىك قىزمەتتەر پورتالىندا تىركەلگەن مامانداردىڭ ەلەكتروندىق ءتىزىمى، وندا الەۋمەتتىك قىزمەتكەر تۋرالى تولىق اقپارات بار: جەكە دەرەكتەرى، ءبىلىمى، بىلىكتىلىكتى ارتتىرۋ تۋرالى مالىمەتتەرى، اتتەستاتتاۋدان ءوتۋ تۋرالى مالىمەتتەرى، جۇمىس تاجىريبەسى جانە ت. ب، دەپ حابارلايدى aqshamnews.kz.
ءتىزىلىم ارناۋلى الەۋمەتتىك قىزمەتتەر كورسەتەتىن بارلىق مامانداردىڭ تىزبەسىن ءتيىمدى قالىپتاستىرۋعا، الەۋمەتتىك قىزمەتكەرلەر تۋرالى اقپاراتقا قولجەتىمدىلىكتى جاقسارتۋعا جانە كورسەتىلەتىن قىزمەتتەردىڭ ساپاسىن ارتتىرۋعا مۇمكىندىك بەرەدى.
قازاقستاندا 2024 جىلدىڭ قورىتىندىسى بويىنشا 1023 وبەكتى بولىمشەلەرىن ەسكەرە وتىرىپ، بارلىعى 502 مەملەكەتتىك ۇيىم جانە 122 ۇەۇ ارناۋلى الەۋمەتتىك قىزمەت كورسەتەدى. ولاردىڭ ىشىندە ارناۋلى الەۋمەتتىك قىزمەت كورسەتۋ ورتالىقتارى، كۇندىزگى بولۋ ورتالىقتارى، وڭالتۋ ورتالىقتارى مەن ۇيدە الەۋمەتتىك كومەك كورسەتۋ بولىمشەلەرى، ۋاقىتشا بولۋ ورتالىقتارى جانە داعدارىس ورتالىقتارى بار.
الەۋمەتتىك قىزمەتكەرلەر بۇگىندە 8 قىزمەت ءتۇرىن كورسەتەدى، ولار: الەۋمەتتىك-تۇرمىستىق، الەۋمەتتىك-پسيحولوگيالىق، الەۋمەتتىك-پەداگوگيكالىق، الەۋمەتتىك-قۇقىقتىق، الەۋمەتتىك-ەكونوميكالىق، الەۋمەتتىك-مادەني، الەۋمەتتىك-ەڭبەك جانە الەۋمەتتىك-مەديسينالىق قىزمەت.
ءااق وڭالتۋدىڭ جەكە باعدارلاماسىنا سايكەس، ولاردىڭ الۋشىلارىنىڭ جاسىن جانە دەنساۋلىق جاعدايىن، سونداي-اق تۇرۋ جاعدايلارىن ەسكەرە وتىرىپ تاعايىندالادى.