مەگاپوليستە 700-دەن اسا ساناق قىزمەتكەرى وقىتىلدى
ق ر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ الماتى قالاسىنىڭ 2021 جىلدىڭ ۇلتتىق ساناققا دايىندىق جۇمىستارىمەن تانىستى.
2021 جىلدىڭ ۇلتتىق ساناعىنىڭ نەگىزگى كەزەڭى 1 قىركۇيەك پەن 30 قازان ارالىعىندا جۇرگىزىلەدى. دەگەنمەن تۇرعىن جاي رەتىندە قولدانىلاتىن تۇرعىن ۇيلەر مەن تۇرعىن ەمەس ورىنجايلاردىڭ ءتىزىمىن الدىن الا ناقتىلاپ الۋ قاجەت. دايىندىق كەزەڭى 1–30 ماۋسىم ارالىعىندا جۇرگىزىلەدى.
قازىرگى تاڭدا قالادا 48 نۇسقاۋشىلىق جانە 618 تىركەۋ ۋچاسكەلەرى قۇرىلعان. 4 مامىردان باستاپ 37 نۇسقاۋشىمەن ۇلتتىق ساناققا دايىندىق جۇرگىزۋ جانە وتكىزۋ بويىنشا ەڭبەك شارتتارى جاسالعان. سونداي-اق، نۇسقاۋشى باقىلاۋشىلارمەن، سۇحباتتاسۋشىلارمەن اقىلى قىزمەت كورسەتۋ كەلىسىمشارتتارى جاسالعان. ساناقتى ساپالى وتكىزۋ ماقساتىندا بارلىق ساناق قىزمەتكەرى – 703 ادام الماتى قالاسىنىڭ ستاتيستيكا دەپارتامەنتىنىڭ بازاسىندا وقىتىلدى.
قازىرگى ۋاقىتتا ساناق قىزمەتكەرلەرى تولىقتاي وقىتىلىپ، ورىنجايلارمەن، كومپيۋتەرلەرمەن، جيھازدارمەن قامتاماسىز ەتىلدى. كومپيۋتەرلەرى مەملەكەتتىك ورگانداردىڭ ءبىرىڭعاي كولىك ورتاسىنا قوسىلدى. ءاربىر قىزمەتكەر جەكە قورعانىس قۇرالدارىمەن قامتىلعان. قالالىق اۆتوكولىكتە تەگىن ءجۇرۋ ماسەلەسى شەشىلدى. ءاربىر نۇسقاۋشىلىق جانە تىركەۋ ۋچاسكەسىنە ۋچاسكەلىك پوليسيا ينسپەكتورى بەكىتىلگەن.
نۇربولات سەرعالي ۇلى، ۇلتتىق ستاتيستيكا بيۋروسىنىڭ باسشىسى:
– ەلىمىز تاۋەلسىزدىگىن العالى بيىل ءۇشىنشى رەت حالىق ساناعى وتەدى. ءبىزدى ۇلكەن جۇمىس كۇتىپ تۇر. تەك الماتىنىڭ وزىندە ءبىزدىڭ سۇحباتتاسۋشىلارىمىز ساناققا دەيىن 600 مىڭنان استام تۇرعىن جانە تۇرعىن ەمەس ورىن جايلاردى ارالاپ شىعۋى كەرەك. بۇل وتە ماڭىزدى كەزەڭ. سۇحباتتاسۋشىلارعا بەرىلەتىن جۇكتەمەنىڭ دۇرىس ءبولىنۋى مەن تۇرعىن سانىنىڭ نەگىزگى ساناق كەزەڭىندە تولىق ەسەپكە الىنۋى وسى جۇمىستارعا بايلانىستى بولماق. قالادا ساناق قىزمەتكەرلەرىن قابىلداۋ كەزىندە ول تۋرالى دەپارتامەنتتىڭ سايتىنا جانە الەۋمەتتىك جەلىگە، تۇرعىنداردى جۇمىسپەن قامتۋ ورتالىعىنىڭ، «ەڭبەك ەلەكتروندى بيرجاسى» ءاج-نىڭ الەۋمەتتىك جەلىلەرىنە حابارلاندىرۋلار بەرىلدى. جوو-نا، جاستار ۇيىمدارىنا حاتتار جىبەرىلدى. سونداي-اق، جۇمىسقا ورنالاستىرۋ جونىندەگى جەكە سايتتارعا حابارلاندىرۋلار شىعارىلدى. بيىلعى حالىق ساناعىنىڭ باستى ەرەكشەلىگى – 1 قىركۇيەك پەن 15 قازان ارالىعىندا ونلاين-ساناق وتۋگە مۇمكىندىك بولادى. ەڭ الدىمەن، ارنايى sanaq.gov.kz سايتىندا جۇرگىزىلەدى. ەكىنشىدەن، egov.kz ەلەكتروندى ۇكىمەت پورتالى ارقىلى ساناققا قاتىسۋعا بولادى. ۇشىنشىدەن، ءبىز ساناق جۇرگىزۋگە ىڭعايلى ارنايى باعدارلاما دايىندالۋدا. تامىز ايىنا دەيىن باعدارلاما دايىن بولسا حالىق ساناعىن سول باعدارلاما ارقىلى جۇرگىزۋگە مۇمكىندىك بولادى.
ايدار احمەتبەك ۇلى، ق ر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ الماتى قالاسى بويىنشا دەپارتامەنتىنىڭ باسشىسى:
– حالىق ساناعى بويىنشا جۇمىستىڭ قارقىنى جامان ەمەس. ساناق قىزمەتكەرلەرى قالانىڭ 68 پايىز تۇرعىن ۇيلەرىن ارالاپ ۇلگەردى. بۇل جۇمىس كەلەسى اپتانىڭ اياعىنا دەيىن ءبىتىپ قالادى. جالپى، 703 ادام قاراستىرىلعان، ونىڭ ىشىندە 618 سۇحباتشى ءۇي-ۇيدى ارالاپ جۇمىس جۇرگىزۋ ۇستىندە. ونىڭ ۇستىنە سۇحباتشىلاردى قاداعالايتىن نۇسقاۋشىلار بار. ودان باسقا ساناق جۇمىستارىن ۇيىمداستىراتىن ارنايى ۋاكىلدەر بار. الدىن الا الىنعان مالىمەت بويىنشا، ساناق قىزمەتكەرلەرى تۇرعىندار تۇرۋى مۇمكىن 631 083 تۇرعىن جانە تۇرعىن ەمەس ورىنجايلاردى ارالاۋى كەرەك. 2021 جىلدىڭ 18 ماۋسىمىنا ساناق قىزمەتكەرلەرى ارالاعان ۇيلەردىڭ، تۇرعىن ۇيلەردىڭ، عيماراتتاردىڭ جانە تۇرۋ ءۇشىن پايدالاناتىن تۇرعىن ەمەس ورىنجايلاردىڭ سانى 401 168 نىسان (64%) بولدى. مۇندا تۇراتىن تۇرعىندار سانى – 1113450 ادام.
