جەدەل-ىزدەستىرۋ ءىس-شارالارى بارىسىندا اقش-تان ق ر ازاماتتارىنىڭ اتىنا حالىقارالىق پوچتا جونەلتىمدەرى ارقىلى تۇرمىستىق ءونىم رەتىندە جاسىرىلعان ەسىرتكى زاتتارى تۇسكەنى انىقتالدى.
بۇل تۋرالى باس پروكۋراتۋرا مالىمدەدى، دەپ حابارلايدى aqshamnews.kz.
«قازپوشتا» اق كەدەندىك باقىلاۋ ايماعىندا استانا قالاسىندا 1،2 كگ گاشيش مايى تاركىلەندى. سونىمەن قاتار ايىپتالۋشىنىڭ تۇرعىلىقتى جەرىن ءتىنتۋ كەزىندە الماتىدا 4،38 گرامم ورالعان مەفەدرون تابىلدى، - دەلىنگەن مالىمەتتە.
استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ايىپتالۋشىنى اسا ءىرى مولشەردە ەسىرتكى جانە پسيحوتروپتىق زاتتاردى كونترابانداعا جانە وتكىزۋگە كىنالى دەپ تانىدى. 16 جىلعا باس بوستاندىعىنان ايىرۋ جازاسى تاعايىندالدى.
ۇكىم زاڭدى كۇشىنە ەنگەن جوق.