الماتىدا «بالقاش كولى ەكوجۇيەسىن ساقتاۋ بويىنشا ماستەر-جوسپار ازىرلەۋ» تاقىرىبىندا ەكى كۇندىك سەمينار وتۋدە.
جيىندا سۋ رەسۋرستارى جانە يرريگاسيا مينيسترلىگىنىڭ اقپاراتتىق-تالداۋ ورتالىعى قۇجاتتى دايىنداۋعا ارنالعان جول كارتاسىن تانىستىردى، دەپ حابارلايدى aqshamnews.kz.
جول كارتاسىندا ىلە-بالقاش باسسەينىنىڭ جەر ءۇستى جانە جەر استى سۋ رەسۋرستارىنىڭ جاي-كۇيى مەن ساپاسىن كەشەندى تۇردە زەرتتەۋ، بالقاش كولىنىڭ دەڭگەيىن باقىلاۋعا ارنالعان سيفرلىق پلاتفورما قۇرۋ، سۋ نىساندارىن اۆتوماتتاندىرۋ جانە سيفرلاندىرۋ، سونداي-اق باسىم گيدروتەحنيكالىق قۇرىلىستاردى دامىتۋ شارالارى قاراستىرىلعان.
بۇدان بولەك، ىلە-بالقاش باسسەينىنىڭ سۋ رەسۋرستارىن ۇتىمدى جانە ءتيىمدى پايدالانۋ بويىنشا شارالار، سونداي-اق قحر-مەن بىرلەسىپ سۋ قورعاۋ جانە تۇراقتى پايدالانۋ ماسەلەلەرى بويىنشا ءىس-شارالار ازىرلەنگەن.
بالقاش كولىنىڭ باسسەينى بويىنشا زەرتتەۋ جۇمىستارى فرانسيانىڭ دامۋ اگەنتتىگى (AFD)، فرانسيانىڭ گەولوگيالىق جانە تاۋ-كەن زەرتتەۋلەر بيۋروسى (BRGM) جانە قازاقستاندىق ماماندارمەن بىرلەسىپ جۇرگىزىلەدى. قازىرگى ۋاقىتتا فرانسۋز تاراپى قاجەتتى مالىمەتتەردى جيناۋ ۇستىندە. اتاپ ايتقاندا، BRGM ساراپشىلارى بالقاش باسسەينىندەگى ۇڭعىمالاردى، گيدروبەكەتتەردى جانە سۋارمالى جەرلەردى ارالاپ، دالالىق زەرتتەۋ جۇمىستارىن جۇرگىزۋدى جوسپارلاپ وتىر.
الماتىدا ءوتىپ جاتقان سەميناردى سۋ رەسۋرستارى جانە يرريگاسيا مينيسترلىگى «قازاقمىس كورپوراسياسى» ءجشس-نىڭ قولداۋىمەن ۇيىمداستىردى. ءىس-شاراعا مينيسترلىك پەن باسقا دا مەملەكەتتىك ورگانداردىڭ وكىلدەرى، حالىقارالىق ۇيىمدار مەن فرانسيانىڭ الماتىداعى باس كونسۋلدىعىنىڭ وكىلدەرى، سونداي-اق عالىمدار مەن ساراپشىلار قاتىسىپ جاتىر.
بالقاش كولىنە قاتىستى ماسەلەلەر ۇزاق ۋاقىت بويى جۇيەسىز، بولەك-بولەك شەشىلىپ كەلدى. ەندى وسى سالاداعى جۇمىستاردى جۇيەلى جانە كەلىسىلگەن دەڭگەيگە كوشىرۋ ءۇشىن بالقاش كولىن ساقتاۋ مەن قورعاۋ جونىندەگى ماستەر-جوسپار ازىرلەۋدى باستادىق. بۇل قۇجات باسسەيننىڭ سۋ رەسۋرستارىن باسقارۋدا تابيعات، ەكونوميكا جانە قوعام مۇددەلەرىنىڭ تەپە-تەڭدىگىنە نەگىزدەلگەن تۇتاس، سالارالىق ءتاسىلدى قالىپتاستىرۋدا ماڭىزدى كەزەڭ بولادى. ماستەر-جوسپاردى ازىرلەۋ ءۇشىن سۋ، ەكولوگيا، ەنەرگەتيكا، اۋىل شارۋاشىلىعى جانە ىلە-بالقاش ءوڭىرىنىڭ الەۋمەتتىك-ەكونوميكالىق دامۋى سىندى بارلىق نەگىزگى باعىت بويىنشا كەشەندى زەرتتەۋ مەن تالداۋ قاجەت. بۇگىن ۇسىنىلعان جول كارتاسى وسى ماقساتتا دايىندالدى»، – دەدى سۋ رەسۋرستارى جانە يرريگاسيا ءبىرىنشى ۆيسە-مينيسترى بولات بەكنياز.