قىركۇيەك ايىنىڭ ورتاسىنان باستاپ قازاقستاندا جاتىر موينى وبىرىنىڭ نەگىزگى قوزدىرعىشى بولىپ تابىلاتىن ادام پاپيللوماسى ۆيرۋسىنا (اپۆ) قارسى قىزداردى جالپىۇلتتىق ۆاكسيناسيالاۋ باستالدى.
ق ر باس مەملەكەتتىك سانيتاريالىق دارىگەرىنىڭ 17 قىركۇيەكتەگى قاۋلىسىنا سايكەس جوسپارلى تۇردە 11 جاستاعى قىزدار ۆاكسيناسيالاۋعا جاتادى. سونداي-اق، 12 جاستان 13 جاسقا دەيىنگى قىزدارعا ارنالعان يممۋنداۋ جۇرگىزىلەدى، دەپ حابارلايدى aqshamnews.kz دەنساۋلىق ساقتاۋ مينيسترلىگىنە سىلتەمە جاساپ.
بۇل ماڭىزدى ءىس-شارا ەلدە ءقاۋىپتى ينفەكسيانىڭ تارالۋىن تومەندەتۋگە جانە ونكولوگيالىق اۋرۋلاردىڭ پايدا بولۋ ءقاۋپىن ازايتۋعا باعىتتالعان. قازىرگى ۋاقىتتا يممۋنداۋ شەڭبەرىندە ءتيىستى جاستاعى وقۋشى قىزدار ۆاكسيناسيالانۋدا. ۆاكسيناسيالاۋ مەكتەپتەر مەن ەمحانالاردىڭ مەديسينالىق كابينەتتەرىندە، اتا-انالاردىڭ نەمەسە زاڭدى وكىلدەردىڭ اقپاراتتاندىرىلعان كەلىسىمىن العاننان كەيىن جۇرگىزىلەدى.
جاتىر موينى وبىرى قازاقستانداعى بارلىق جاستاعى ايەلدەردىڭ اراسىندا ەڭ كوپ تارالعان ەكىنشى قاتەرلى ىسىك جانە 25 پەن 44 جاس ارالىعىنداعى ايەلدەر ءولىمىنىڭ ەكىنشى سەبەبى بولىپ تابىلادى. جىل سايىن ەلدە بۇل اۋرۋدىڭ 1900-گە جۋىق جاڭا جاعدايى تىركەلەدى. عىلىمي زەرتتەۋلەر جاتىر موينى وبىرىنىڭ نەگىزگى سەبەبى اپۆ ينفەكسياسى ەكەنىن دالەلدەدى. اپۆ ۆاكسيناسى ءوزىنىڭ تيىمدىلىگى مەن قاۋىپسىزدىگىن حالىقارالىق دەڭگەيدە دالەلدەدى.
بۇگىنگى تاڭدا اپۆ ۆاكسيناسى الەمنىڭ 135 ەلىندە قولدانىلادى. ءبىرقاتار ەلدەردە ۆاكسيناسيالاۋدىڭ ارقاسىندا ايەلدەردىڭ اراسىندا اپۆ-نىڭ تارالۋى 90%-عا تومەندەدى. بۇگىنگى كۇنى رەسپۋبليكا بويىنشا اپۆ-عا قارسى ۆاكسيناسيالاۋدىڭ كۇندەلىكتى مونيتورينگىنىڭ ناتيجەلەرى بويىنشا 22،2 مىڭ بالا، ونىڭ ىشىندە 11 جاستا – 14 مىڭ بالا، 12-13 جاستا-8،2 مىڭ بالا ەگىلدى.