«قازگيدرومەت» قازاقستاندا بولاتىن اپتاپ ىستىق تۋرالى حابارلامانى جوققا شىعاردى
WhatsApp مەسسەندجەرىندە تاراعان حابارلامادا قازاقستاندىقتار جازدا اپتاپ ىستىق بولادى دەپ دابىل قاعۋدا. اۋا تەمپەراتۋراسى سەلسيي بويىنشا 50 گرادۋسقا دەيىن كوتەرىلەدى. عالىمداردىڭ ايتۋىنشا، مۇنداي قۇبىلىس 60 جىلدا ءبىر رەت بولادى ەكەن. بۇل جالعان، - دەپ حابارلايدى almaty-akshamy.kz stopfake.kz-كە سىلتەمە جاساپ.
اۋا تەمپەراتۋراسى رەكورد كورسەتكىشكە دەيىن كوتەرىلەتىنى تۋرالى فەيك بۇرىننان بار. "قازگيدرومەت" رمك بيىل تاراعان اقپاراتقا قاتىستى پىكىر ءبىلدىردى.
"ماۋسىمدىق بولجام قىسقا مەرزىمدى بولجامدارمەن ناقتىلانىپ وتىرادى. "قازگيدرومەت" ءبىر تاۋلىككە، 3 كۇنگە جانە ءبىر اپتاعا بولجام جاسايدى. ايلىق بولجامداردىڭ تەك 70 پايىزى ورىندالادى. قازاقستاندا قۋاڭ دالا ايماقتار بار. تۇركىستان وبلىسى. بۇل وڭىردە جازدا اۋا تەمپەراتۋراسى 40 گرادۋسقا دەيىن كوتەرىلۋى - قالىپتى جاعداي. الەمنىڭ بىردە-بىر ەلىندە سينوپتيكتەر تۇتاس ءبىر ماۋسىمعا بولجام جاسامايدى. ولار جورامالداپ ايتادى. دامىعان ەلدەردە بولجام ءبىر كۇنگە، 3 كۇنگە جانە ءبىر اپتاعا جاسالادى. ەسەسىنە، اپتالىق بولجامدار دا ناقتىلانادى. بولجام ۇزاق مەرزىمگە جاسالسا، ول ناقتى جاعدايعا سايكەس بولمايدى. ينتەرنەتتە جاريالانعان اقپاراتقا ەمەس، تەك رەسمي دەرەككوزدەرگە سەنىڭىز. الداعى جازعا ارنالعان كونسۋلتاتيۆتىك بولجاممەن ءبىزدىڭ رەسمي پورتالىمىزدا تانىسا الاسىزدار"، - دەدى "قازگيدرومەت" رمك باسپا ءسوز قىزمەتى.