قازاقستاندا اليمەنت مولشەرى ارتۋى مۇمكىن

ادىلەت مينيسترلىگى وسىنداي باستاما كوتەرىپ وتىر.

ۆەدومستۆو اليمەنت تولەيتىن اكەلەردىڭ بەرەتىن تيىن-تەبەنى بالانى باعىپ، وسىرۋگە جەتپەيدى دەگەن بايلامعا كەلدى، دەپ حابارلايدى Almaty-akshamy.kz

ۇلتتىق ستاتيستيكا بيۋروسىنىڭ مالىمەتىنشە، قازاقستاندا اجىراسۋلار سانى جىل سايىن ءوسىپ بارادى. مىسالى، 2000 جىلى 27 391 نەكە بۇزىلسا، 2005 جىلى بۇل كورسەتكىش 32 377-گە، 2010 جىلى 41 617-گە، 2015 جىلى 53 293-كە، 2019 جىلى – 59 796-عا جەتكەن. پاندەميا كەزىندە اجىراسۋ سانى ءبىرشاما ازايعان: 2020 جىلى 48 002ء-نى، ال بىلتىرعى 2021 جىلى 48 239-دى قۇرادى.

سونىمەن قاتار، ادىلەت مينيسترلىگى اجىراسقان جۇبايلار اراسىندا اليمەنت داۋى ءجيى ءورشيتىنىن ايتىپ دابىل قاعۋدا. بۇل دا داعدارىستىڭ ءبىر كورىنىسى بولسا كەرەك. سوندىقتان ۆەدومستۆو «ماجبۇرلەپ ورىنداتۋ تۋرالى» جاڭا زاڭ جوباسى اياسىندا اليمەنتتەردىڭ قولدانىستاعى مولشەرىن قايتا قاراپ، ءوسىرۋدى جوسپارلاپ وتىر.

«قازاقستانداعى اليمەنتتەردى ءوندىرىپ الۋدىڭ قولدانىستاعى جۇيەسىنە سايكەس، بورىشكەر ءوز تابىسىنىڭ نەمەسە جالاقىسىنىڭ ءبىر بولىگىن تولەيدى. اتاپ ايتقاندا، 1 بالاسى بولسا، وعان تابىسىنىڭ 4-تەن 1 بولىگىن، 2 بالاعا – ۇشتەن ءبىر بولىگىن، 3 جانە ودان كوپ بالاعا تابىسىنىڭ، جالاقىسىنىڭ جارتىسىن بەرۋگە ءتيىس. ءبىراق بۇل جۇيە بالانىڭ قاجەتتىلىكتەرىن تولىق كولەمدە قامتاماسىز ەتپەيدى. ونىڭ ۇستىنە، اليمەنت مولشەرى ونى تولەۋشىنىڭ جالاقىسىنىڭ بەلگىلى ءبىر بولىگىنە بايلانىستى بولعاندىقتان، بۇل وعان اقشانى ءتيىستى كولەمدە بەرۋدەن جالتارۋ ءۇشىن تولەمدەردى جاساندى تۇردە تومەندەتۋىنە مۇمكىندىك بەرەدى. مىسالى، جالاقىسى تۋرالى قۇجاتتاردى بۇرمالايدى، جۇمىس بەرۋشىمەن كەلىسىپ، تابىسى-جالاقىسىنىڭ كولەمىنە قاتىستى جالعان كەلىسىمشارتتار جاساسادى»، - دەپ ءتۇسىندىردى ادىلەت مينيسترلىگى.