قازاقستاندا ءالى كۇنگە دەيىن كوروناۆيرۋستىڭ بارىنا سەنبەيتىن ازاماتتار بار. سونداي-اق، ولار ۆاكسيناعا دا سەنبەيدى ەكەن. بۇل تۋرالى ق ر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆ ءمالىم ەتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«ۆيرۋستى جەڭۋدىڭ جالعىز جولى ۆاكسينا ەكەنىن ادامدارعا تولىقتاي جەتكىزۋ مۇمكىن بولماي وتىر. كەيبىر ادامدار مەديسينانىڭ قۇدىرەتىن جانىنا دەرت باتقاندا نەمەسە جاقىنىنان ايرىلعان كەزدە عانا ءتۇسىنىپ جاتادى. وكىنىشكە قاراي، ءالى كۇنگە دەيىن كوروناۆيرۋسقا سەنبەيتىن قازاقستاندىقتار بار. ۆيرۋسپەن 3ء-شى جىل كۇرەسىپ كەلەمىز. سەنبەگەنىمەن قويماي، COVID-19-دى سىزدەر ويلاپ تاپتىڭىزدار عوي دەپ سۇرايتىن جاندار بار. بۇل جەردە فەيك اقپاراتتاردىڭ تارالۋى كەرى اسەرىن تيگىزىپ جاتىر. جالعان اقپاراتتارعا قاتىستى كۇنىنە بىرنەشە تۇسىنىك بەرىپ، رەسمي اقپاراتا سۇيەنۋ كەرەكتىگى تۋرالى ايتىپ جاتىرمىز. دەگەنمەن كەلەسى كۇنى باسقا ءبىر فەيك شىعىپ جاتادى»، - دەدى ەرجان بايتانايەۆ "حابار" تەلەارناسىنا بەرگەن سۇحباتى بارىسىندا.
ونىڭ ايتۋىنشا، ءقازىر الەمدە ۆاكسيناعا سۇرانىس جوعارى جانە ونى ەلگە جەتكىزۋ مەملەكەتتىك دەڭگەيدەگى كەلىسسوز بەن بىرنەشە رەت كەزدەسۋدىڭ ناتيجەسىندە جۇزەگە اسىپ جاتىر.
«سوندىقتان مۇمكىندىكتى پايدالانىپ، تەگىن ۆاكسينانى الۋ كەرەك. ونىڭ ۇستىنە ءبىزدىڭ ۆاكسينانىڭ بىرنەشە ءتۇرى بار. ياعني ادامداردا تاڭداۋ بار. قازاقستانعا سىرتتان اكەلىنەتىن ءار ۆاكسينا زەرتحانالىق تەكسەرىس پەن باقىلاۋدان وتەدى. سودان سوڭ ەكپەنى ەل اۋماعىندا رەسمي تىركەۋدەن وتكىزەدى. ۆاكسيناعا قاتىستى تاعى ءبىر ماڭىزدى جايت - قازاقستاندا ۆاكسينا الىپ، قايتىس بولدى دەگەن جاعداي تىركەلگەن ەمەس»، - دەيدى ول.