قازاقستاندا الاياقتار جالعان تۇلعالار (دروپپەرلەر) ارقىلى 24 ميلليارد تەڭگەنى ($45 ميلليون) زاڭسىز اينالىمعا ەنگىزگەن. بۇل تۋرالى قارجى مونيتورينگى اگەنتتىگى ءمالىم ەتتى، دەپ حابارلايدى aqshamnews.kz.
اگەنتتىكتىڭ مالىمەتىنشە، 2024 جىلى 6 مىڭنان استام دروپ-كارتا تىركەلگەن. ولاردى كوبىنەسە ەسىرتكى ساۋداسى، كيبەرالاياقتىق جانە زاڭسىز قۇمار ويىندارى ءۇشىن قولدانعان. بانكتىك كارتالار مەن ەسەپشوتتار جۇمىسسىزدار، ستۋدەنتتەر مەن زەينەتكەرلەردىڭ اتىنا راسىمدەلگەن.
الاياقتار قاراپايىم ازاماتتاردى از مولشەردە اقشا ۇسىنىپ، كارتالارىن نەمەسە جەكە دەرەكتەرىن بەرۋگە كوندىرەدى. وسىلايشا، ولاردى زاڭسىز سحەمالارعا تارتىپ، قىلمىستىق ارەكەتتەردىڭ ءبىر بولىگىنە اينالدىرادى. قارجى مونيتورينگى اگەنتتىگى ازاماتتاردى جەكە دەرەكتەرىن ەشكىمگە بەرمەۋگە جانە كۇماندى ۇسىنىستاردان باس تارتۋعا شاقىرادى.