بۇل تۋرالى پرەزيدەنت قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىندا ايتتى
«الدىمىزدا تاعى ءبىر وتە ماڭىزدى مىندەت تۇر. ءبىز اگروونەركاسىپ كەشەنىندە ناقتى سەرپىلىس جاساۋىمىز كەرەك. اۋىل شارۋاشىلىعى سالاسىنىڭ الەۋەتى وراسان زور. ءبىراق ءبىز قولدا بار مۇمكىندىكتەردى ءالى دە تولىق پايدالانباي وتىرمىز. قازاقستاننىڭ اينالاسىندا ءونىم وتكىزەتىن وتە ۇلكەن نارىقتار بار. وندا ساپالى ازىق-تۇلىك ونىمدەرى تاپشى»، - دەدى قاسىم-جومارت توقايەۆ.
پرەزيدەنت قازاقستاننىڭ ستراتەگيالىق ماقساتى – ەۋرازيا قۇرلىعىنداعى باستى اگرارلىق ورتالىقتىڭ بىرىنە اينالۋ ەكەنىن ايتتى.
«وسى ماقساتقا قول جەتكىزەمىز دەسەك، ەڭ الدىمەن، ءونىمدى جوعارى دەڭگەيدە وڭدەۋگە كوشۋىمىز قاجەت. ونسىز بولمايدى. ءبىز الداعى ءۇش جىل ىشىندە اگروونەركاسىپتەگى وڭدەلگەن ءونىم ۇلەسىن 70 پايىزعا جەتكىزۋىمىز كەرەك. بۇل – ناقتى مىندەت. جۇرتتى ءونىم وڭدەۋگە ىنتالاندىرۋ كەرەك. ول ءۇشىن سالىق ساياساتىن قايتا قاراۋ قاجەت. بۇل سالادا ءىرى كومپانيالار كوبىرەك بولسا، ناقتى سەرپىلىس جاساۋعا بولادى. ءبىز ەكسپورتتى ۇلعايتا وتىرىپ، ىشكى نارىقتى دا ۇستاپ تۇرۋىمىز كەرەك. سوندىقتان ەلىمىزگە ساپالى ءونىمدى قاجەتتى كولەمدە تۇراقتى ۇسىنا الاتىن كاسىپورىندار قاجەت. وتاندىق اگروفيرمالاردىڭ ءىرى كومپانيالار قاتارىنا كىرگەنى ءجون بولار ەدى. سونداي-اق ءوزارا ءتيىمدى شارتتاردى ۇسىنىپ، بۇل جۇمىسقا حالىقارالىق كورپوراسيالاردى بەلسەندى تۇردە تارتۋ كەرەك»، - دەدى مەملەكەت باسشىسى.
سونىمەن بىرگە، پرەزيدەنت ەت، ءسۇت، استىق ونىمدەرىن تەرەڭ وڭدەۋ جانە وندىرىستىك جىلىجاي شارۋاشىلىقتارىن دامىتۋ سياقتى كەلەشەگى زور باعىتتارعا باسىمدىق بەرۋ كەرەگىن جەتكىزدى.
«ءوز ەلىمىزدەگى اۋىل شارۋاشىلىعى كاسىپورىندارىنىڭ الەۋەتىن قاپەردەن شىعارماعان ءجون. وسى رەتتە 100-دەن استام ءىرى ءسۇت-تاۋار فەرماسى سالىنىپ جاتقان سولتۇستىك قازاقستان وبلىسىنىڭ جەتىستىكتەرى كوپكە ۇلگى. شارۋالاردىڭ تاجىريبەسى مول، جەم-شوپ قورى دا جەتكىلىكتى. وعان قوسا بايىپتى قولداۋ شارالارى قولعا الىنعان. وسىنىڭ ءبارى تۇتاسا كەلە ءتاپ-تاۋىر ناتيجە بەرىپ وتىر. قۇس فابريكالارىن، كوكونىس قويمالارىن، ەت ونىمدەرىن شىعاراتىن كاسىپورىندار سالعان كەزدە وسى تاجىريبەنى باسشىلىققا الۋ كەرەك»، - دەدى قاسىم-جومارت توقايەۆ.